Ձեր վստահելի աղբյուրը

Ամերիկյան ABC հեռուստաալիքի հետաքննող լրագրող Ջեյմս Գորդոն Միկը անհետացել է այն բանից հետո, երբ ՀԴԲ-ի աշխատակիցները կես տարի առաջ խուզարկել էին նրա բնակարանը։ Այս մասին գրում է «Ռիա Նովոստի» գործակալությունը՝ հղում անելով «Rolling Stone» պարբերականին:

Պարբերականի տվյալներով՝ լրագրողի տան խուզարկությունն Արլինգթոն քաղաքում (Վիրջինիա նահանգ) իրականացվել է դեռ ապրիլի 27-ին։ Դրանից հետո հարևաններից ոչ մեկը չի տեսել Միկին, և նրա բնակարանը դատարկ է թվում:

ABC-ի ներկայացուցիչը «Rolling Stone»-ին պատմել է Միկի «շատ անսպասելի» հեռացման մասին:

«Նա անհետացավ երկրի երեսից։ Մարդիկ հարցնում են, բայց ոչ ոք չգիտի պատասխանը»,- ասել է լրագրողի գործընկերներից մեկը։

Իրազեկ աղբյուրները պնդում են, որ խուզարկության ժամանակ դաշնային գործակալները, իբր, գաղտնի տեղեկատվություն են գտել Միկի նոութբուքում։

Հետաքննող լրագրողի մասնագիտական գործունեության որ ասպեկտները կարող էին առաջացնել ՀԴԲ-ի հետաքրքրությունը, հայտնի չէ, նշում է պարբերականը: Լրագրողն աշխատել է ծայրահեղ զգայուն թեմաների շուրջ, որոնք կապված են ահաբեկչական խմբավորումների պարագլուխների եւ ամերիկացի պատանդների հետ: