Պեսկովը հայտարարել է, թե Ուկրաինայից «կեղտոտ ռումբի» կիրառման սպառնալիքն ակնհայտ է

Քաղաքական 17:59 24/10/2022 Աշխարհում

«Կեղտոտ ռումբի» կիրառման հնարավորության մասին տեղեկատվությանը հավատալը կամ չհավատալը Արևմուտքի գործն է, սակայն այդ սպառնալիքն ակնհայտ է: РБК-ի թղթակցի փոխանցմամբ լրագրողներին այդ մասին ասել է ՌԴ նախագահի խոսնակ Դմիտրի Պեսկովը։

«Նրանց անվստահությունը չի նշանակում, որ նման «կեղտոտ ռումբի» սպառնալիքը դադարում է գոյություն ունենալ։ Սպառնալիքը կա: Այդ տեղեկությունը ներկայացվել է պաշտպանության նախարարի զրուցակիցներին։ Դրանից հետո հավատալը կամ չհավատալը նրանց գործն է»,-ասել է Պեսկովը:

Հոկտեմբերի 23-ին Ռուսաստանի պաշտպանության նախարար Սերգեյ Շոյգուն հեռախոսազրույց է ունեցել Թուրքիայի, Ֆրանսիայի, Մեծ Բրիտանիայի և Միացյալ Նահանգների գործընկերներ՝ Հուլուսի Աքարի, Սեբաստիան Լեկորնուի, Բեն Ուոլեսի և Լլոյդ Օսթինի հետ, և նրանց հայտնել Կիևի կողմից «կեղտոտ ռումբի» օգտագործման հավանականության մասն: Ավելի ուշ Պետդեպարտամենտի ղեկավար Էնթոնի Բլինքենը, Ֆրանսիայի և Մեծ Բրիտանիայի արտաքին գործերի նախարարներ Քեթրին Քոլոննան և Ջեյմս Քլերլին հայտարարություն են տարածել՝ մերժելով ռուսական կողմի մեղադրանքները։ Նրանք ևս մեկ անգամ հավաստիացրել են Ուկրաինային իրենց աջակցությունը։

Նման ռումբի կիրառման հնարավորությունը հերքել է նաեւ Ուկրաինայի ԱԳՆ ղեկավար Դմիտրի Կուլեբան՝ Մոսկվայի հայտարարությունները անվանելով անհեթեթ եւ վտանգավոր։ Ավելի ուշ նա Ատոմային էներգիայի միջազգային գործակալության (ՄԱԳԱՏԷ) ղեկավարին առաջարկել է փորձագետներ ուղարկել Ուկրաինա, քանի որ Կիևը «թաքցնելու ոչինչ չունի»։

«Կեղտոտ ռումբը» կարող է բաղկացած լինել ռադիոակտիվ նյութերի և պայթուցիկ նյութերի տարաներից։ Նման ռումբի տարբերակներից մեկը կարող է լինել ռադիոակտիվ նյութերի օգտագործմամբ ոչ ռազմական կայանքի պայթեցումը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: