Ձեր վստահելի աղբյուրը

Ազգային ժողովում հայտարարությունների ժամին «Հայաստան» խմբակցության պատգամավոր Ագնեսա Խամոյանն իր ելույթում անդրադարձավ ՌԴ ԱՊՀ գործերի, եվրասիական ինտեգրման և հայրենակիցների հետ կապերի հանձնաժողովի նախագահ Կոնստանտին Զատուլինի՝ Հայաստան մուտքի արգելքին՝ ընդգծելով, որ պարոն Զատուլինն արդեն հայտարարել է՝ Հայաստանի իշխանությունների հիստերիկ  որոշումները չեն ազդելու իր հայանպաստ դիրքորոշման և գործունեության վրա։

«Հայ-ռուսական հարաբերությունների մասին ընտանեկան թերթով, գաղտագողի, անհեթեթ ծանուցումներ տվող, երկիրն առհասարակ թերթով ղեկավարող «հավաստի աղբյուրն» այսօր ի լուր աշխարհի հայտարարել է, որ արգելվում է ՌԴ ԱՊՀ գործերի, եվրասիական ինտեգրման և հայրենակիցների հետ կապերի հանձնաժողովի նախագահ Կոնստանտին Զատուլինի մուտքը Հայաստան։ Մարդու, ով միշտ աչքի է ընկել բացառապես իր հայամետ դիրքորոշումներով, մարդու, ում մուտքը դեռ տարիներ առաջ արգելվել է  Ադրբեջան Արցախ այցելելու և  ղարաբաղյան հակամարտության հարցում հայանպաստ դիրքորոշումերով հանդես գալու համար։

Սա աչքալուսանք էր Ադրբեջանին և Թուրքիային, որի քաղաքացիներն անարգելք մուտք են գործում Հայաստան,  պղծում Ցեղասպանության հուշահամալիրը, որի  պաշտոնյաները, որոնք բազմիցս հանդես են եկել Հայաստանի ինքնիշխանության և տարածքային ամբողջականության դեմ հայտարարություններով, բայց Հայաստանի օրվա իշխանությունների կողմից չեն հռչակվել անցանկալի անձ,  ընդհակառակը՝  արժանացել են նրանց բարեհաճությանը, բաց դռների քաղաքականությանը»,- ասաց ընդդիմադիր պատգամավորը։

Նա հիշեցրեց, որ Կ.Զատուլինը 1995 թ. Պետդումայի որոշման հեղինակն է, որից հետո ՌԴ խորհրդարանի կողմից ճանաչվել է Հայոց ցեղասպանությունը։

«Հետևողականորեն հայ-ռուսական հարաբերությունները փչացնող օրվա իշխանությունը բացառապես սեփական իշխանության շահերից է մեկնաբանում դաշնակից Ռուսաստանի խորհրդարանի պատգամավորի խոսքերն ու անտեսնում նրա հայամետ դիրքորոշումը, քանզի «հավաստի աղբյուրին» բացառապես սեփական աթոռն է հետաքրքրում, այլ ոչ երկրի շահը»,- հայտարարեց Անգնեսա Խամոյանը։