Ձեր վստահելի աղբյուրը

«Կոնստանտին Զատուլինն այս պահին մասնակցում է նիստի, և չի կարող պատասխանել հարցերին»,-Panorama.am-ի հետ զրույցում ասաց ՌԴ ԱՊՀ գործերի, եվրասիական ինտեգրման և հայրենակիցների հետ կապերի հանձնաժողովի նախագահի քարտուղարը։

Նրա խոսքով, Զատուլինի մուտքը Հայաստան արգելելու մասին տեղեկատվությանը մեկնաբանություն կլինի ավելի ուշ։

Նշենք,  «Հայկական ժամանակ»-ը, վկայակոչելով իր տեղեկությունները, գրել է, որ ՌԴ ԱՊՀ գործերի, եվրասիական ինտեգրման և հայրենակիցների հետ կապերի հանձնաժողովի նախագահ Կոնստանտին Զատուլինի մուտքը Հայաստանի Հանրապետություն արգելվել է։

«Զատուլինն այլևս համարվում է անցանկալի անձ Հայաստանում։

Հիշեցնենք՝ իր հրապարակային հարցազրույցներում Զատուլինը բազմիցս մեղադրել է ՀՀ իշխանությանը 44-օրյա պատերազմի պարտության համար:

Ավելին՝ ներխուժելով Հայաստանի ներքաղաքական կյանք՝ Զատուլինը մեկ անգամ չէ, որ բարձրաձայնել է, թե Նիկոլ Փաշինյանը պետք է հեռանա։ Զատուլինը հասցրել էր անգամ ՀՀ իշխանություններին մեղադրել հայ-ռուսական հարաբերությունների մեջ սեպ խրելու համար։ Իսկ Հայաստան կատարած վերջին այցելության ժամանակ «Երկիր Մեդիա»-ին տված հարցազրույցի ընթացքում նա մեղադրել էր վարչապետին ՀՀ սուվերեն տարածքով «միջանցք» ստորագրելու համար։ «Հնարավոր միջանցքի շուրջ հարցերը պետք է տալ ստորագրողներին, «միջանցքը» ստորագրել է Փաշինյանը»,- ասել էր Զատուլինը։

Նկատենք, սակայն, որ նոյեմբերի 9-ի եռակողմ հայտարարության մեջ խոսք անգամ չկա ՀՀ սուվերեն տարածքով միջանցքի մասին։ Հայտարարության մեջ խոսվում է միայն Լաչինի միջանցքի մասին»,-գրել է ՀԺ-ն ու այս նյութին կից հրապարակել է Կ. Զատուլինի ու Ռոբերտ Քոչարյանի լուսանկարը։

Նշենք, որ Կ. Զատուլինը մշտապես հանդես է եկել պրոհայկական հայտարարություններով։