Ձեր վստահելի աղբյուրը

«Հայաստանի ինքնիշխան տարածքի, Հայաստանի նկատմամբ անհարգալից վերաբերմունք դրսևորած, հայտարարություններ արած յուրաքանչյուր անձի հանդեպ, անկախ նրանից, որևէ այլ երկիր կներկայացնի, թե ոչ, բնական է, Հայաստանը  չի կարող անտարբեր լինել,- Աժ-ում լրագրողների հետ ճեպազրույցում ասաց ԱԺ նախագահ Ալեն Սիմոնյանը՝ արձագանքելով ՌԴ ԱՊՀ գործերի, եվրասիական ինտեգրման և հայրենակիցների հետ կապերի հանձնաժողովի նախագահ Կոնստանտին Զատուլինի՝ Հայաստան մուտքի արգելքի մասին հարցերին։

Նա ընդգծեց, որ ՀՀ-ն մեզ համար կարմիր գիծ է, սահմանները կարմիր գիծ են, ուստի բոլոր ընկերները, գործընկերները պետք է հաշվի նստեն այդ իրողության հետ։

Հարցին՝ «Россия Сегодня» մեդիա խմբի և RT հեռուստաալիքի գլխավոր խմբագիր Մարգարիտա Սիմոնյանի մուտքը Հայաստան ևս արգելվա՞ծ է, Սիմոնյանն ասաց. «Նման ինֆորմացիա չունեմ, բայց չեմ բացառում թե ինքը, թե իր ամուսինը, թե հայկական ազգանունով տարբեր երկրների  գործակալներ, մանկուրտներ, տարբեր մարդիկ, ովքեր ՀՀ,  ՀՀ անկախութան, նախկին ղեկավարների նկատմամբ անհարգալից վերաբերմունք կդրսևորեն։ Ի դեպ մասնավոր զրույցներում շատ վիրավորական արտահայտություններ կանեն։ Կարող է մի օր ջղայնանամ և  պատմեմ, թե այդ մարդիկ մասնավոր զրույցներում ինչպես են ասում։ Վստահ եմ՝ իրենց դուր չի գա, խորհուրդ եմ տալիս ավելի քիչ պաշտպանել»։