Ձեր վստահելի աղբյուրը

«Մեկ տարի է անցել այս ֆորմատով եռակողմ հանդիպումից, կարծում եմ՝ ժամացույցներն ուղղելու անհրաժեշտություն կա»,- խորհրդարանական ճեպազրույցների ժամանակ ասաց «Քաղաքացիական պայմանագիր» խմբակցության պատգամավոր Սարգիս Խանդանյանը՝ պատասխանելով հարցին, թե ի՞նչ օրակարգով է Հայաստանը մասնակցելու Սոչիում հոկտեմբերի 31-ին նախատեսված Փաշինյան-Պուտին-Ալիև եռակողմ հանդիպմանը։

Նա նշեց, որ հայկական կողմի օրակարգը հարցերի պարզաբանումն է, ադրբեջանական վերջին ագրեսիան, դրա հետևանքների շուրջ  խոսակցությունը, 2020 թ. նոյեմբերի 9-ի, 2021 թ. հունվարի 11-ի,  նոյեմբերի հայտարարությունների կատարման վերլուծությունը, իսկ Ադրբեջանի զորքերի դուրսբերումը ՀՀ օրակարգն է ցանկացած հարթակում։ ՔՊ-ականի խոսքով, դա իրենց  համար կարմիր գիծ և պահանջ է։

Ճեպազրույցին ներկա ՔՊ-ական պատգամավոր Անդրանիկ Քոչարյանն ավելացրեց, որ զորքերի դուրս բերումը ոչ թե պահանջ է, այլ անհրաժեշտություն. «Անկախ  նրանից, թե բանակցություններն ինչ ընթացք կստանան, ինչ որ պատկանում է Հայաստանին, քննարկման նյութ չէ, մեր ինքնիշխան տարածքում որևէ օտար զինվորի ներկայությունը երբևէ չի հանդուրժվելու, և նրանք պետք է խաղաղ պայմաններում դուրս գան մեր տարածքից, մնացած բոլոր դեպքերում դա պահպանելու է կոնֆլիկտի լարվածությունը  մեր սահմանների վրա, իսկ դա ոչ մեկին լավ տեղ չի հասցնելու»։

ՔՊ-ական Արթուր Հովհաննիսյանն ասաց, որ  առհասարակ որևէ մի բանակցություններում, առավել ևս գերլարված իրավիճակում, ցանկացած  նախապայման կարող են համարել գործընթացների սառեցում և նշանակելու  է կանգնեցում, ինչը խիստ վտանգավոր է  ոչ միայն  հայ-ադրբեջանական այս լարվածության կոնտեսքում, այլ տարածաշրջանի համար։

«Դրա համար մեր պատկերացումները հետևյալն են՝ բոլոր հնարավոր  հարթակներում ներկայացում ենք այս պահանջը, պահանջը նաև ներկայացնում են  մեր միջազգային գործընկերները շատ կոնկրետ և հասցեական, և հույս ունենք ադրբեջանական ռազմաքաղաքական ղեկավարությունը վերջիվերջո զորքերը հետ կքաշի ելման դիրքեր։ Բանակցությունների այս  գործընթացում այս պահանջները զուգահեռ են միմյանց  հետ ընթանում, և մենք հույս ունենք, երբ որ գա մի պահ,  երբ որ հնարավոր կլինի խաղաղության պայմանագրի վերաբերյալ որևէ տեքստի շուրջ խոսել, որևէ գործնական քայլի անցնել, այդ պահի դրությամբ ադրբեջանական զինված ուժերը դուրս կգան հայկական սուվերեն տարածքից և կդադարեցնեն հայկական հողերի օկուպացիան»,- ասաց Ա. Հովհաննիսյանը։

Հարցին՝ մինչև տարեվերջ՝ մինչև խաղաղության պայմանագրի ստորագրումը, դելիմիատացիա և դեմարկացիա  է նախատեսվում անել, հնարավո՞ր է  այդ կարճ ժամանակում իրականացնել գործընթացը, Ա. Քոչարյանը պատասխանեց. «Բնականաբար ոչ, բայց պրոցեսը գնում է, ժամանակային սահմանափակումը չպետք է խոչընդոտ լինի։

Գլխավորն այն է, որ մենք համաձայնվենք այդ պրոցեսը լինի շարունակական և ակնկաշկանդ, սեղանի վրա ունենանք այնպիսի մի փաստաթուղթ  միջազգայնորեն ճանաչված սահմանների առումով, որպեսզի կարողանանք  դելիմիտացիայի և դեմարկացիայի խնդիրների շուրջ այս փաստաթղթի  շրջանակներում աշխատել։ Հանձնախմբերը  պետք է աշխատեն, նախ պետք է հանձնախմբերը ցանկություն ունենան ընդունել այդ իրողությունը և աշխատել դրա վրա»,- ասաց ՔՊ-ական պատգամավորը։