Ձեր վստահելի աղբյուրը

Ցանկացած փաստաթուղթ, որը կսահմանափակի Արցախի ինքնորոշման իրավունքը, մեր կողմից պատռվելու է, անընդունելի է, և ամեն կերպ դրա դեմ պայքարելու ենք։ Այս մասին  լրագրողների հետ զրույցում ասաց ԱԺ «Հայաստան» խմբակցության պատգամավոր Իշխան Սաղաթելյանը։

Նրա խոսքով՝ դա լինի ամերիկյան, ռուսական, չինական, հնդկական, թե արևմտյան` կապ չունի։ «Որևէ տարբերակ, որը կսահմանափակի Արցախի ինքնորոշման իրավունքը` պայքարելու ենք դրա դեմ»,- ընդգծեց նա։

Իշխան Սաղաթելյանը նշեց, որ Նիկոլ Փաշինյանը չունի այդ իրավունքն ու մանդատը` միայնակ որոշելու 5000-ամյա ժողովրդի ճակատագիրը։ «Բազմաթիվ անգամ ասել ենք՝ այստեղ միայն Արցախի հարցը չէ, Հայաստանի, հայկական պետականության գոյության հարցն է։ Այն, ինչ անում է այս խեղկատակը մեր երկրի, ժողովրդի գլխին` տանելու է կործանման, ինչը պետք է կասեցնել»,- հավելեց նա։

Ըստ նրա՝ միակ ճանապարհը երկիրը նոր կապիտուլյացիայից կանխելու և ստեղծված իրավիճակից դուրս գալու՝ համաժողովրդական, համահայկական ընդվզումն է օրվա իշխանությունների դեմ:

Հարցին, թե Արցախում հոկտեմբերի 30-ին հանրահավաք է անցկացվելու, ինչ է անելու ընդդիմությունը, Իշխան Սաղաթելյանը պատասխանեց. «Մեր պայքարը կանգ չի առել, Արցախի հանրահավաքից անմիջապես հետո մենք կարձագանքենք և կներկայացնենք պայքարի այն ձևերն ու մեթոդները, որոնք պատկերացնում ենք առաջիկայում: Այս պահին վստահեցնում եմ, որ ամեն ինչ անելու ենք»:

Դիտարկմանը՝ արդյոք ընդդիմությունը ազդակ ստացել է Արևմուտքից, որ Հայաստանը ձգտում է Արցախը ճանաչել Ադրբեջանի կազմում, քաղաքական գործիչն ասաց, որ կա սեղանին դրված հստակ փաստաթուղթ, որը մամուլում հրապարակվել է։

«Կլինի Մոսկվայում, Վաշինգտոնում, թե Բրյուսելում` մեր դիրքորոշումը շատ հստակ է։ Ի տարբերություն Նիկոլ Փաշինյանի մենք ամեն տեղ մի բան չենք ասում իրար հակասող, դա մեզ համար հստակ է, կարմիր գիծ է, քննարկման ենթակա չէ։ Չի կարող լինել որևէ լուծում, որով Արցախը կմնա Ադրբեջանի կազմում»,- ընդգծեց նա։