Ձեր վստահելի աղբյուրը

ՌԴ նախագահ Վլադիմիր Պուտինն Արցախի հարցի վերաբերյալ մի բան ասաց, որն այս կամ այն ձևով հնչել էր, նորություն չէր: Այս մասին լրագրողների հետ զրոույցում ասաց ՀՀ նախկին վարչապետ Վազգեն Մանուկյանն՝ անդրադառնալով ՌԴ նախագահի հայտարարությանը, թե իրենք ՀՀ-ին առաջարկել են վերադարձնել 5 շրջան, սակայն Հայաստանի ղեկավարությունը գնաց իր ճանապարհով:

«Այսինքն՝ մնում է այն հին վիճակը, երբ բոլոր բանակցությունների ժամանակ «տարածքներ Արցախի անկախության ճանաչման դիմաց» սկզբունքն է եղել։ Հիմա նրա անդրադարձը նշանակում է, որ համաձայնագրի ռուսական ծրագրում նշվում է՝ Արցախի հարցն այժմ չի քննարկվում, դրվում է հետ: Դա ցույց է տալիս, որ Ռուսաստանը չի հրաժարվում այդ հարցի հետագա քննարկումից, ինչը ես դրական եմ համարում»,- ընդգծեց Վազգեն Մանուկյանը։

Հարցին՝ ռուսական կողմը կարո՞ղ է վաշինգտոնյան փաստաթղթից տարբերվող այլ փաստաթուղթ առաջարկել, նա նշեց, որ ենթադրություններ չի անում. «Դիրքորոշումները պարզ են։ Եթե դուք խորանաք ԱՄՆ-ի շահերի և Ռուսաստանի շահերի մեջ, ապա այդ շահերը ճանաչելով պետք է որ Ռուսաստանը չհամաձայնի վաշինգտոնյան տարբերակին»:

Անդրադառնալով Հայաստանում հակառուսական քարոզչությանը` Վազգեն Մանուկյանն ընդգծեց, թե ՀՀ իշխանություններն ասում են՝ Ռուսաստանը վստահելի չէ, քանի որ ընկերացել է Ադրբեջանի և Թուրքիայի հետ։

«Եթե այդպիսի նախադասություն ես ասում, ուրեմն դու Ադրբեջանին և Թուրքիային թշնամի ես համարում: Ռուսաստանին մեղադրում ես, որ քո թշնամիների հետ լեզու է գտել, ուրեմն վտանգավոր է:  Եվ դրանից հետո անտրամաբանական հետևություն ես անում՝ Ռուսաստանին պետք է այստեղից քշել դուրս, բայց այդ դեպքում մնում ես այդ թշնամիների դեմ: Իրենք ասում են՝ Արևմուտքը կգա, այդ տեղը կզբաղեցնի: Ռուսաստանն ու Թուրքիան իսկապես համագործակցում են, բայց նույն ձևի ԱՄՆ-ն և Արևմուտքը փորձում են Թուրքիային պոկել Ռուսաստանից: Այսինքն՝ նրանք էլ շահագրգռված են թուրքական շահերն առաջ տանել»,- նշեց Վազգեն Մանուկյանը։

Նրա խոսքով՝ Թուրքիան շատ վարպետորեն խաղում է Ռուսաստանի և Արևմուտքի մեջտեղում, բայց ի վերջո հակասությունները լինելու են Ռուսաստանի հետ, քանի որ ծրագրերը, որ ունի Թուրքիան, կապված են այս տարածքի հետ։

«Թուրքիան ուզում է թուրանական մեծ պետություն կառուցել և իր թշնամին այդտեղ դառնալու է Ռուսաստանը։ Այսինքն՝ ուշ, թե շուտ, բախում է լինելու Ռուսաստանի հետ: Այդ դեպքում Թուրքիան դառնում է Արևմտյան, իսկ Արևմուտքին այս տարածաշրջանը կարող է այնքան չհետաքրքրել, որքան Ռուսաստանին: Ստացվում է՝ ռուսներին քշում ես, մնում ես թուրքերի տիրապետության տակ: Դա ակնհայտ է: Եթե դու Թուրքիային համարում ես թշնամի, ինչո՞ւ ես այդպես անում»,- նշեց նա։

Ըստ Վազգեն Մանուկյանի՝ քաղաքականության մեջ պետք է ուժերի բալանս լինի, երկիրը պետք է դաշնակցություն ունենա տարբեր երկրների հետ, որոնց մեջ հակասություն կա. «Այդ դեպքում դու էլի ազատ կլինես, բայց եթե դու կախված ես լինելու Թուրքիայից, էլ ի՞նչ ազատություն, ի՞նչ սուվերենություն»։