«Ժողովուրդ». Ինչու են ՔՊ-ական երեք պատգամավորների թիկնապահներ տրամադրվել

Օրվա մամուլ 09:25 29/10/2022 Հայաստան

«Ժողովուրդ» թերթը գրում է.

««Ժողովուրդ» օրաթերթի տեղեկություններով՝ ԱԺ «Քաղաքացիական պայմանագիր» խմբակցության պատգամավորներ Սիսակ Գաբրիելյանին, Հրաչյա Հակոբյանին և Վահագն Ալեքսանյանին տևական ժամանակ անվտանգության աշխատակիցներ են տրամադրած եղել:

Նկատենք՝ նախորդ տարին խորհրդարանում բավականին թեժ էր, և պարբերաբար բախումներ էին տեղի ունենում իշխանական և ընդդիմադիր խմբակցությունների պատգամավորների միջև: Դրանցից մեկի ժամանակ՝ 2021 թվականի օգոստոսի 25-ին, ակտիվ էր, օրինակ, ՔՊ-ական Վահագն Ալեքսանյանը, որը ոտքով հարվածեց «Հայաստան» խմբակցության պատգամավոր Վահե Հակոբյանին:

Մեկ այլ անգամ էլ ծեծկռտուքի ժամանակ դահլիճում այդ ամենին հետևում էր վարչապետ Նիկոլ Փաշինյանը: Եվ, ահա, ընդդիմության և իշխանության այս և մյուս միջադեպերից հետո ուժային կառույցները կապ են հաստատել ԱԺ ՔՊ-ական պատգամավոր, ՀՀ վարչապետի տիկնոջ եղբոր՝ Հրաչյա Հակոբյանի, ՔՊ պատգամավորներ Սիսակ Գաբրիելյանի և Վահագն Ալեքսանյանի հետ և հայտնել, որ նրանց պետք է ապահովեն անվտանգության աշխատակիցներով, ասել է թե՝ թիկնապահներ տրամադրեն:

«Ժողովուրդ» օրաթերթի տեղեկությունների համաձայն՝ ուժային կառույցները ՔՊ-ական պատգամավորներին բացատրել են, որ օպերատիվ տվյալներ կան, որ միգուցե որոշ անձինք փորձեն հաշվեհարդար տեսնել իրենց հետ և ծեծի ենթարկեն նրանց:

Այս ամենից հետո վերոնշյալ ՔՊ-ական պատգամավորները տևական ժամանակ անվտանգության աշխատակիցների հսկողությամբ են գնացել ցանկացած վայր և միայն մոտ մեկ ամիս առաջ են առանց թիկնապահների շրջում»։

Մանրամասները թերթի այսօրվա համարում։

Հարակից հրապարակումներ`

«Հրապարակ». Նիկոլ Փաշինյանը պայթեցրեց իր և թիմակիցների կողմից փչված փուչիկը «խաղաղության պայմանագրի» ռուսական տարբերակի մասին

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: