Ձեր վստահելի աղբյուրը

«Քանի որ հիմա Առողջապահության նախարարությունը սկսել է  մեծ նշանակություն տալ ընտանեկան բժշկության զարգացմանը և հստակ աշխատանքներ են գնում, ռազմավարական ժամանակացույց է կազմվել առաջիկա տարիների համար, այդ պատճառով էլ ընտանեկան բժիշկներին շատ կարևոր են ոչ միայն թերապևտիկ գծով գիտելիքներ, այլև վիրաբուժական, ակնաբուժական, որոշ չափով նաև գինեկոլոգիական, որոնց ավելի պարզ դեպքերն ընտանեկան բժշկի տիրույթում են»,- հայտնեց Առողջապահության նախարարության ընտանեկան բժշկության գծով խորհրդատու, ընտանեկան նժիշկ, սրտաբան, «Կարդիոմեդ» ընտանեկան բժշկության կենտրոնի տնօրեն Սամվել Հայրումյանը:

Նրա խոսքով՝ նոր հրատարակված «Բուժում է «Վարդանանց» գիրքը տալիս է նման գիտելիքներ ընտանեկան բժիշկներին:

«Այս գիրքը շատ լավ օգնում է, որ բժիշկները ձեռքի տակ ունենան սեղանի գիրք և արագ, եթե ինչ-որ բան մոռացել են, որովհետև նրանց գործունեության սպեկտրը մեծ է, կարողանան օգտվել և՛ նշանակումների առումով, և՛ հետազոտությունների, որպեսզի ավելորդ հետազոտություններ և նշանակումներ չանեն և  ճիշտ ժամանակին հոսպիտալացնեն եթե կարիքը կա»,-ասաց բժիշկ-սրտաբանը և շարունակեց. «Քովիդի համաճարակի ժամանակ մասնակցել եմ ուղեցույցների մշակմանը, որում ներգրավված են եղել նաև ԵՄ փորձագետներ, արագ կազմել ենք այդ ուղեցույցները և արագ ներկայացրել ենք բոլոր ընտանեկան բժիշկներին: Նույնիսկ, նախարարության կողմից որոշ ուղեցույցներ անընհատ մշակվում են և հիմա էլ անընդհատ ընթացքի մեջ են, բայց այս գրքում  փորձ է արվել ավելի մեծ սպեկտր ընդգրկել և ավելի մեծ ծավալ, որը շատ մեծ աշխատանք է:

Իսկ բժիշկն այքանով կարող է պաշտպանված զգալ իրեն, եթե օգտվում է գործելակարգերից, և նախարարությունն էլ ակտիվ գործում է, որ այդ պակասը լրացվի, ինչը հնարավորություն կտա նաև բժիշկներին պաշտպանված լինել: Այս գիրքն էլ շատ օգտակար կլինի, որ բժիշկն ձեռքի տակ ունենա այս ուղեցույցը և ապացուցի, որ իր նշանակումները հիմնավորված են՝ հիմնված միջազգային տարբեր ուղեցույցների վրա»:

Սամվել Հայրումյանը մասնակցում էր այսօր «Արմենիա Մարիոթ» հյուրանոցի Տիգրան Մեծ դահլիճում  կազմակերպված «Բուժում է «Վարդանանց»-ը գրքի շնորհանդեսին: