Ձեր վստահելի աղբյուրը

Արդեն երկու տարի է, ինչ Արցախի Հանրապետության ժողովուրդը ապրում ու արարում է ոչ սովորական պայմաններում՝ անորոշություն, Ադրբեջանի կողմից պատերազմի վերսկսման սպառնալիքներ, հոգեբանական ճնշումներ, ենթակառուցվածքների պարբերական խաթարումներ և նման տասնյակ խնդիրներ։ Այս մասին Արցախի Հանրապետության Ազգային ժողովի արտահերթ նիստում հայտարարեց պատգամավոր Գեղամ Ստեփանյանը։

Նշենք, որ նիստը հեռարձակվում է Ստեփանակերտի Վերածննդի հրապարակում։

Գեղամ Ստեփանյանի խոսքով՝ երկու տարի է արցախցիները տագնապի զանգ են հնչեցնում միջազգային հանրությանը և բոլոր շահագրգիռ կառույցներին՝ փորձելով նրանց հասցնել այն ակնհայտ ճշմարտությունը, որ Ադրբեջանը շարունակում է ագրեսիվ գործողությունները՝  բազմիցս խախտելով կրակի դադարեցման և ռազմական գործողություններին վերջ տալու եռակողմ հայտարարության ելակետային դրույթը։

«Այս ամենով Ադրբեջանը մեծապես վնասում է նաև 2020 թվականի նոյեմբերի 9-ի հայտարարությամբ Արցախում տեղակայված խաղաղապահ առաքելությանը՝ կասկածի տակ դնելով ՌԴ ռազմաքաղաքական ղեկավարության ջանքերի արդյունավետությունը։ Երկու տարի Ադրբեջանը միջազգային բոլոր ատյաններում համառորեն ձգտում է տպավորություն ստեղծել, թե ադրբեջանա-ղարաբաղյան հակամարտությունը լուծված է։

Ստիպված ենք ցավով արձանագրել, որ միջազգային որոշ կառույցներում և որոշ ազդեցիկ երկրներում Ադրբեջանի մատուցած, այսպես ասած փաստարկները ոչ միայն արժանանում են ուշադրության, այլև փորձ է արվում ժողովրդի ինքնորոշման իրավունքը ստորադասել աշխարհաքաղաքական հետաքրքրություններին, որոշ դեպքերում էլ ադրբեջանական նավթին և գազին»,- նշեց նա։

Գեղամ Ստեփանյանի խոսքով՝ որևէ հակամարտության լուծում չի կարող միակողմանի զիջումների հաշվին լինել։ «Մենք չենք համարում, որ խնդիրը լուծված է, քանի դեռ որոշված չէ Արցախի վերջնական կարգավիճակը, քանի վերականգնված չեն Ադրբեջանի կողմից բռնազավթված տարածքներից բռնի տեղահանված քաղաքացիների խախտված իրավունքները, քանի դեռ բռնազավթված տարածքներում հետևողականորեն ոչնչացվում են հայկական մշակութային ու հոգևոր ժառանգությունը։ Վերջապես հակամարտությունը չի կարող լուծված համարվել, քանի դեռ միջազգայնորեն ամրագրված չեն Արցախի ժողովրդի սեփական ճակատագիրը ինքնուրույն որոշելու արդեն իսկ իրացված իրավունքը ու լիարժեք պաշտպանված չէ մեր ժողովրդի անվտանգությունը»,- հայտարարեց պատգամավորը։ 

Նա նաև նշեց, որ ինչպես նախկինում, այնպես էլ 2020 թվականի պատերազմից հետո Արցախի Հանրապետության հանրային և պետական կառույցներ անհատական և հավաքական կարծիքների միջոցով մշտապես հայտարարել են այն բացահայտ ճշմարտության մասին, որ հայկական Արցախը երբեք Ադրբեջանի մաս չի կարող լինել ու չի լինելու, քանի որ Արցախն Ադրբեջանի կազմում նշանակելու է տարածք՝ առանց իր բնիկ հայ բնակչության։

«Այսօր մեր ուղերձն աշխարհին այն է, որ արցախցին տերն է իր հայրենիքին, իր հայրենի հողում խաղաղ ու անվտանգ ապրելու իրավունքին և շարունակելու է իր գոյության պայքարը՝ իրավունքի ճանաչման ու միջազգային հանրության լիիրավ անդամ դառնալու համար։ Այս հարցում Արցախի ժողովուրդն ունի ինչպես մայր հայրենիքի ու աշխարհասփյուռ հայության, այնպես էլ իր անվտանգությունն այսօրվա դրությամբ ապահովող ռուսական խաղաղապահ առաքելության, միջազգային կազմակերպությունների, տարածաշրջանի կայունությամբ հետաքրքրված ուժային կենտրոնի, Մոսկվայի, Վաշինգտոնի, Փարիզի, Բրյուսելի աջակցության կարիքը։

Մարդու իրավունքներն իրենց համար գերակայություն հռչակած երկրներն իրավունք չունեն աչք փակել Արցախում նոր ցեղասպանության նախապատրաստության փաստի վրա, դա պարզապես զավեշտ է 21-րդ դարի աշխարհակարգի համար»,- ասաց Գեղամ Ստեփանյանը։

Մանրամասները՝ տեսանյութում։