Ձեր վստահելի աղբյուրը

«Գաղտնիք չէ, որ այսօր Արցախը, Հայաստանը, հայ ժողովուրդը գտնվում են պատմական, ճակատագրական փուլում, մեր զույգ հայկական պետությունները, հայ ժողովուրդը դիմագրավում են շատ ծանր մարտահրավերներ»,- ասուլիսում ասաց ՀՅԴ ԳՄ ներկայացուցիչ, «Հայաստան» խմբակցության պատգամավոր  Իշխան Սաղաթելյանը։

Նա նշեց, որ այս իրավիճակում ու այս պայմաններում հասարակության մեջ կա երկու հիմնական տեսակետ. «Մի տեսակետի հեղինակն այսօրվա իշխանություններ են, ովքեր ասում են, որ նոյեմբերի 9-ի կապիտուլյացիայով ավարտված պատերազմն այլևս դատավճիռ է, մենք չունենք որևէ ռեսուրս և հնարավորություն դուրս գալու ստեղծված իրավիճակից, և մեր ժողովրդին առաջարկում են նոր կորուստների ու զրկանքների գնով գնալ ինչ-որ երևակայական խաղաղության հետևից, ըստ էության, առաջարկում են զիջել հայրենիքի մի մասը մնացած մասը փրկելու համար։

Կա ստեղծված իրավիճակից դուրս գալու երկրորդ տեսակետը, որն առաջարկում են ազգային ուժերը, և, ըստ էության, ժողովուրդը։ Դա պայքարի օրակարգն է, դա այն է, որ նոյեմբերի 9-ը  դատավճիռ չէ, չպետք է համակերպվել ստեղծված իրավիճակին, հայրենիքի  մի մասը զիջելով կզիջենք ամբողջը։

Օրվա իշխանության առաջարկած օրակարգն ու ճանապարհն, ըստ էության, կործանարար է, մենք առաջարկում ենք համախմբել ողջ հայ ժողովուրդի ներուժը, վերականգնել  Հայաստան-Արցախ-Սփյուռք եռամիասնությունը, մոբիլիզացնել  համահայկական բոլոր հնարավոր ռեսուրսները և լծվել հայրենիքի պաշտպանության, անվտանգության, վերականգնման գործին»։

Ի. Սաղաթելյանի խոսքով, այս իմաստով երեկ այն, ինչ տեղի ունեցավ Արցախում, պատմական իրադարձություն է, շատ կարևոր և արժեքավոր արձանագրում ի լուրջ ամբողջ աշխարհի։ 

Ընդդիմադիր քաղաքական գործիչն առանձնացրեց մի քանի կարևոր արձանագրում. «Արցախի ժողովուրդը, պետական կառավարման մարմինները, խորհրդարանական ուժերը մեկ միասնական ճակատով հայտարարեցին, որ Արցախը երբեք չի եղել ու չի լինելու Ադրբեջանի կազմում։ Արցախում հստակ հայտարարեցին, որ Արցախն Ադրբեջանին  բռնակցելու ցանկացած փորձ անընդունելի է  Արցախի ժողովրդի համար և արժանանալու է դիմադրության։

Երրորդ կարևոր արձանագրումը, որ հնչեց Արցախից՝ Հայաստանի որևէ իշխանություն չունի որևէ իրավունք ստորագրելու որևէ փաստաթուղթ, որը կսահմանափակի Արցախի ինքնորոշման իրավունքը։

Երեկ հստակ ուղերձ հղեցին Արցախից  համայն հայությանը՝  շարունակեք տեր կանգնել Արցախին,  սատար  կանգնեք Արցախի ազգային շահերին, կանգնեք Արցախի կողքին։ Իրենք հստակ հայտարարեցին՝ իրենց պայքարի պատրաստակամությունը, հայրենիքին ու  իրենց իրավունքներին տեր կանգնելու շատ կարևոր առաքելության մասին»։

Ի.Սաղաթելյանն ընդգծեց՝ հիմա  գնդակը Հայաստանի դաշտում է, հայտարարեց նոյեմբերի 5-ին ժամը 15։00-ին Ֆրանսիայի հրապարակում հանրահավաք հրավիրելու մասին։

«Նոյեմբերի 5-ի հանրահավաքը միասնության հանրահավաք է, միասնություն ոչ թե որևէ անձի, քաղաքական ուժի կամ ընդդիմության շուրջ,  այլ միասնություն Արցախի ինքնիշխանության շուրջ, միասնություն Հայաստանի տարածքային ամբողջականության և անվտանգության շուրջ։

Նոյեմբերի 5-ի  հանրահավաքը հրավիրում է  Դիմադրության շարժումը, բայց դա հայ ժողովրդի հանրահավաքն է։

Հետևաբար, Հայաստանին քաղաքացին նոյեմբերի  5-ին մասնակցելով այդ կարևոր իրադարձությանը, հանրահավաքին, պետք է նախ առաջին արձանագրի՝ տեր է իր հայրենիքին և այդ հայրենիքը սակարկման ենթակա չէ, հայ մարդը, արժանապատիվ հայը նոյեմբերի 5-ին մասնակցելով հանրահավաքին՝ շատ հստակ արձանագրելու է, որ Հայաստանի իշխանությունները չունեն որևէ մանդատ երկիրը նոր զիջումների և կորուստների տանելու, օրվա իշխանությունը չունի  որևէ լեգիտիմ իրավունք, որևէ իրավասություն ստորագրելու որևէ փաստաթուղթ, որը կսահմանափակի Արցախի ինքնորոշման իրավունքը։

Այդ օրը մենք հրավիրում ենք համահայաստանյան և համազգային հանրահավաք հենց դա արձանագրելու համար։

Հետաևաբար, նոյեմբերի 5-ի հանրահավաքը քաղաքական և կուսակցական հանրահավաք չէ, համազգային հանրահավաք է հանուն Արցախի ու հանուն Հայաստանի»,- ասաց նա։

Իշխան Սաղաթելյանը դիմեց Հայ Առաքելական սուրբ եկեղեցուն, Ամենայն Հայոց Կաթողիկոսին՝ ակնկալով իր օրհնությունն ու աջակցությունն այդ շատ կարևոր նախաձեռնությանը, որովհետև դա կուսակցական հանարահավաք չէ, հայ մարդու հանրահավաքն է հայկական օրակարգով։

Նա դիմեց մտավորականներին, գիտական համայնքին, արվեստագետներին. «Հայ ժողովրդի ճակատագրական ու կարևոր պահին կոչով հանդես եկեք, մասնակցեք հանրահավաքին՝ ցույց տալու հայ մտավորականության կամքը, տեսակետը»։

Ի.Սաղաթելյանը դիմեց երիտասարդությանը. «Ոտքի կանգնեք, եկեք միասին տեր կանգնենք մեր հայրենիքին, ամբողջ աշխարհին  ցույց տանք մեր կամքը։ Եկեք  միասին ստանձնեք պատասխանատվություն մեր երկի ճակատագրի ու ապագայի նկատմամբ»։

Նա դիմեց ՀՀ բոլոր քաղաքական ուժերին. «Մի կողմ դնենք կուսակցական, անձնական, քաղաքական շահերը, մրցակցությունը և համախմբել այս կարևոր գաղափարի ու նպատակի շուրջ»։

Դիմեց նաև քաղաքական մեծամասնությանը. «Նիկոլին պաշտպանելու ժամանակը չէ, պաշտպանելով Նիկոլին՝  զոհաբերում եք Արցախն ու Հայաստանը։ Դեռ ուշ չէ, մտածեք, խելքի եկեք, մի առաջնորդվեք զուտ անձնական և Նիկոլի պաշտպանության շահերով»։

«Նոյեմբերի 5-ին ժամը 15։00-ին հայ մարդու հավաքական կամքի դրսևորման օրն է համահայկական օրակարգով։

Մեկ անգամ ևս կոչ ենք անում ժողովրդին՝ ոտքի կանգնել, ամբողջ աշխարհին ցույց տանք, որ մենք պարտված, խեղճացած, վերջացած և համակերպված ժողովուրդ չենք, մենք տեր ենք մեր հայրենիքին»,- ասաց Իշխան Սաղաթելյանը։