Ձեր վստահելի աղբյուրը

«Միայն վարչապետը կամ ֆինանսների նախարարը չեն որ, թվերի մասին են խոսում են, դրանց մասին խոսում է վիճակագրությունը՝ փաստերը»,-ԱԺ ճեպազրույցի ժամանակ հայտարարեց ֆինանսների նախարար Տիգրան Խաչատրյանը՝ պատասխանելով հարցին, թե ինչո՞ւ աշխատատեղերի աճի վերաբերյալ և այլ ոլորտներում արձանագրված աննախադեպ աճերը չի զգում հասարակության զգալի մասը:

Նրա խոսքով՝ ՊԵԿ-ը հաշվետվություն է ստանում տնտեսվաողներից, որտեղից երևում է, որ գրանցված աշխատողների թիվը ավել է նախկինում արձանագրված ցուցանիշների նկատմամբ և պահանջարկի էական աճ է արձանագրվել բարձր որակավորում ունեցող աշխատողների նկատմամբ:

Անդրադառնալով 2023թ բյուջեի նախագծով պետական համակարգում բարձր պարգևավճարները 25 մլրդ դրամով նվազեցնելու և աշխատավարձի ֆոնդը նույնքան ավելացնելու փաստին՝ Տիգրան Խաչատրյանը հիշեցրեց, որ կառավարությունը 2023-ի հունվարի 1-ից նվազագույն աշխատավարձը բարձրացնելու մասին օրենքի նախագիծ է բերել ԱԺ, դրան համապատասխան կավելանա նաև բազային աշխատավարձը և հանրային հատվածում ծառայողների, պետական աշխատողների աշխատավարձերը որոշակի համամասնությամբ կբարձրանա:

«Երկու բան է տեղի ունեցել, երբ մենք վերահաշվարկում էինք այդ բազային աշխատավարձերը, մասամբ դրանք ֆինանսավորվում են այն զուտ ավելացումների հաշվին, որը կառավարությունը կգումարի աշխատավարձի ֆոնդին, իսկ այդպիսիք 2023-ի համար 21 մլրդ դրամ է և մի մասը, որ անցյալում պարգևավճար էր, կվերահաշվարկվի որպես աշխատավարձ: Այսինքն այն, ինչ մենք կոչում էինք պարգևավճար, դա կլինի այդ ծառայողների աշխատավարձի մի մաս»,-ասաց Տիգրան Խաչատրյանը:

Նրա խոսքով՝ եթե նախկինում պետական ծառայողների պարգևավճարները որպես կանոն կազմում էին աշխատավարձի ֆոնդի 30 %-ը, ապա հաջորդ տարի կկազմի 16 %-ը, արդյունքում աշխատավարձերը գրեթե երկու անգամ ավելի շատ կբարձրանան, քան պարգևավճարներն են դարձել աշխատավարձ: