Ձեր վստահելի աղբյուրը

«Պարո՛ն Ֆիդանյան, եկեք պայմանավորվենք, և բոլորին է վերաբերում, օրինակ՝ պարոն Պապիկյանը առավոտ 6-ին զանգել ասել է՝ զավակ եմ ունեցել, ներող կլինեք՝ բյուջեի քննարկմանը չեմ կարող գալ: Մենք կարայի՞նք չհարգել, վերջապես պաշտպանության նախարարն իր առաջին զավակն ունեցավ»,-ԱԺ ֆինանսավարկային և բյուջետային հարցերի և Պաշտպանության ու անվտանգության հարցերի մշտական հանձնաժողովի համատեղ նիստում ոստիկանապետի տեղակալ Արա Ֆիդանյանին դիմեց հանձնաժողովի նախագահ Անդրանիկ Քոչարյանը՝ անընդունելի համարելով, որ բյուջեի քննարկմանը Վահե Ղազարյանը չի ներկայացել:

Քոչարյանը հայտարարեց, թե ԱԻ նախարարն էլ այլ տարածք պետք է գնար, դրա համար զգուշացրել էր և իր փոխարեն տեղակալին էր ուղարկել, բայց ոստիկանապետը Երևանում է:

«Պառլամենտի ամենակարևոր՝ բյուջետային քննարկման օրն է, բա հարցեր կան, որ մենք պետք է հենց առաջին դեմքերի հետ քննարկենք»,-ասաց Քոչարյանը:

Ֆիդանյանը հայտնեց, որ գերծանրաբեռնվածության պատճառով է, որ ոստիկանապետ Վահե Ղազարյանը չի ներկայացել  2023թ. բյուջեի նախագծի քննարկմանը և ինքն է նրա փոխարեն ներկայացնելու Ոստիկանության բյուջեն:

«ՀՀ 2023 թվականի պետական բյուջեից ստիկանությանը նախատեսվում է հատկացնել 76.2 միլիարդ դրամ: 2022 թվականին այն կազմում էր 66.6 միլիարդ դրամ, տարբերությւոնը 14.4 %»,- տեղեկացրեց Ֆիդանյանը:

Նրա խոսքով՝ կապիտալ ծախսերը հիմնականում ներառում են 4 մարզի` Արարատի, Արմավիրի, Սյունիքի և Վայոց Ձորի պարեկային ծառայության գործունեությանն անհրաժեշտ տրանսպորտային միջոցների, սարքերի, սարքավորումների, սպառազինության, շենքերի, շինությունների կառուցման և կապիտալ նորոգման գծով ծախսերը:

Նա տեղեկացրեց, որ 2023 թվականի հունվար ամսին պարեկային ստորաբաժանումներ կձևավորվեն նաև Կոտայքի, Գեղարքունիքի, Տավուշի և Արագածոտնի մարզերում, որտեղ աշխատելու մրցույթին նախապատրաստվելու համար Ոստիկանության կրթահամալիրում ուսուցում է անցնում 615 թեկնածու, որոնցից 313-ը նախկին ոստիկանության ծառայողներ են: