Քաղտեխնոլոգ. Արցախի հզոր հանրահավաքի մեսիջները կարող էին դառնալ բանակցային ռեսուրս
Արցախում տեղի ունեցած հանրահավաքի գլխավոր մեսիջներից մեկն ուղղված էր Ռուսաստանին, որպեսզի այդ երկիրը մեխանիզմներ գտնի ու երկարաձգի խաղաղապահ առաքելությունը։ Լրագրողների հետ հանդիպմանն ասաց քաղտեխնոլոգ Վիգեն Հակոբյանը։
«Նաև ակնարկ կար, որ կարծես Արցախում դեմ չեն լինի, եթե այլ մեխանիզմներ լինեն քաղաքական ու ռազմաքաղաքական սերտացման համար։ Կար հստակ մեսիջ, որ Արցախն իր գոյաբանական խնդրի լուծումը տեսնում է ռուսական խաղաղապահ ուժերի՝ առավել ակտիվ ներգրավման մեջ։ Արցախը նաև հստակ հայտարարեց, որ հայաստանյան որևէ իշխանություն իրավունք չունի Արցախը դիտարկել Ադրբեջանի կազմում»,-ասաց բանախոսը՝ ընդգծելով, որ սրանք կարող էին դառնալ բանակցային ռեսուրս Սոչիի հանդիպման ժամանակ։
Անդրադառնալով Սոչիի եռակողմ բանակցություններին ու դրանց նախորդած երկկողմ հանդիպումներին ու հնչեցրած հայտարարություններին՝ Վ. Հակոբյանը նշեց, Հայաստանի ղեկավարը հայտարարեց՝ դեմ չէ ռուսական տարբերակին, եթե իհարկե, ՌԴ ղեկավարը կարողանա պնդել առաջարկները, ըստ որի, Արցախի կարգավիճակի հարցը պետք է առկախվի։
Մինչդեռ Ալիևը հայտարարեց՝ Արցախի հարց գոյություն չկա, այն լուծվել է երկու տարի առաջ, խոսելու բան առանձնապես չկա։
«Ահա, այս երկու իրարամերժ մեսիջները պարզ դարձրեցին՝ այն օրակարգի շուրջ, որ կարող էր բեկումնային լինել ու կարող էր լուրջ փաստաթուղթ ստորագրվել, լուրջ տարաձայնություններ կան։ Նույնիսկ ասուլիսը ցույց տվեց, որ կար որոշակի հիասթափություն»,-ասաց քաղտեխնոլոգը։
Նա կարծում է, որ նախապես պատրաստված փաստաթղթում փոփոխություններ են արել այն հատվածում, որը վերաբերում է «Լեռնային Ղարաբաղ» եզրույթին։
«Երեկ հրապարակված փաստաթղթում Լեռնային Ղարաբաղ անունը չկար, չկար ինքնորոշման իրավունքի մասին որևէ հիշատակում, անգամ չկա Հայաստանի տարածքում ադրբեջանական զորքերի առկայության վերաբերյալ հիշատակում։ Կարծում եմ, սա Հայաստանի համար լուրջ անհաջողություն է։ Անհաջողության լուրջ տարր կա նաև ռուսական կողմի մոտ, քանի որ այս խաղ վերադառնալիս Ռուսաստանը հույս ուներ որակական փոփոխությունների, բայց ունենք այն, ինչ ունենք»,-ասաց նա՝ ավելացնելով, որ մոտ օրերս կլինեն նոր զարգացումներ, ինչի արդյունքում պարզ կլինի, արդյո՞ք շարունակվում է Պրահայի օրակարգը, թե՞ Մոսկվայի։
Բանախոսը չբացառեց, որ այսօր Իրանի մայրաքաղաքում տեղի է ունենում Սոչիի բանակցությունների շարունակությունը կոմունիկացիաների մասով։
Լրահոս
Տեսանյութեր
Խայտառակություն Թումանյան փողոցում. Չախոյան
