Ձեր վստահելի աղբյուրը

«ԱԺ ավտոտնտեսությունն ունի համալրման խնդիր, քանի որ առկա 46 ավտոմեքենայից 4-ը ներկայացված է օտարման, 20-ից ավել ավտոմեքենայի օգտակար ծառայության ժամկետը սպառված է»,-ՀՀ 2023թ. պետական բյուջեի քննարկման ժամանակ հայտնեց ԱԺ աշխատակազմի ղեկավար-գլխավոր քարտուղար Վահան Նարիբեկյանը:

Նա ասաց, որ առաջնահերթություն էր տրվել էլեկտարմոբիլներին, ուսումնասիրելվել էր Հայաստանի շուկա ներկորղների տեխնիկական բնութագրերը, առաջարկվող գները և ԱԺ աշխատակազմը նպատակահարմար էր գտել 2023 թվականին ձեռք բերել 17 էլէկտրամոբիլ, բայց կառավարությունն այդ հայտի համաձայնություն չի տվել:

ԱԺ աշխատակազմի ղեկավարի խոսքով՝ օտարերկրյա պատվիրակություններին սպասարկելու համար ԱԺ-ն գտել էր, որ պետք է գնվեին հարմարավետ, ներկայացուցչական մեքենաներ, ինչը նույնպես մերժվել էր: Գործադիրը չի բավարարել նաև ԱԺ շենքային պայմանները բարելավելու համար ներկայացված ֆինանսավորման հայտը:

Վերջինիս պատճառն, ըստ ԱԺ աշխատակազմի ղեկավարի,  այն է եղել, որ ոռոգման ջրի համար հորատանցք փորելու բնապահպանական փորձաքննություն չէր անցկացվել, որն արդեն արված է:

Վահան Նարիբեկյանն առաջարկեց  վերականդնել այդ հայտերը և ԱԺ-ին հատկացնել մերժված 385 մլն դրամը՝ տեղեկացնելով, որ 2023թ բյուջեով 6.9 մլրդ դրամ է ԱԺ-ի հատկացումները:

ՔՊ պատգամավոր Գևորգ Պապոյանը  Ֆինանսների նախարար Տիգրան Խաչատրյանին հարցրեց, թե ինչու ԿԲ-ի և Հանրային ծառայությունները կարգավորող հանձնաժողովի մեքենաների փոփոխության բյուջետային հայտը բավարարվել է, իսկ ԱԺ-ինը՝ ոչ:

Տիգրան Խաչատրյանը հայտնեց, որ ԿԲ-ի մեքենաների փոփոխման վերաբերյալ որոշումը նախորդ տարի է կայացված եղել, իսկ ՀԾԿՀ-ի մասնավոր բավարարման հիմքերին ծանոթ չէ:

Նախարարը նաև տեղեկացրեց, որ Նիկոլ Փաշինյանը հանձնարարել է միասնական չափանիշ մշակել պետական համակարգի հին մեքենաները նորերով փոխարինելու համար, այն դեռ չի մշակվել, այդ պատճառով էլ 2023 թ. բյուջեում ձեռնպահ են մնացել շատ պետական հիմնարկների ավտոպարկերի թարմացումից: