Ձեր վստահելի աղբյուրը

Վարչական դատարանը նոյեմբերի 2-ին վճռեց պարտավորեցնել կառավարությանը՝ «ՍիվիլՆեթ»-ին և «Թրանսփարենսի ինթերնեշնլ» հակակոռուպցիոն կենտրոնին տրամադրել Զանգեզուրի պղնձամոլիբդենային կոմբինատի բաժնեմասի նվիրատվության պայմանագիրը։

Բնական պաշարների օգտագործման, կառավարման նկատմամբ հանրային վերահսկողության շրջանակում «Թրանսփարենսի Ինթերնեշնլ հակակոռուպցիոն կենտրոն» ՀԿ-ն ու  «Սիվիլիթաս» հիմնադրամի ներկայացուցիչներ Գենյա Պետրոսյանը, Էլինա Գյուրջյանը և Դավիթ Գյուրջյանն անցած տարվա դեկտեմբերի 16-ին  վարչական դատարան հայցադիմում էին ներկայացրել ընդդեմ Հայաստանի Հանրապետության վարչապետի աշխատակազմի՝ պահանջելով, որ դատարանը պարտավորեցնի տրամադրել ՀՀ կառավարության 30.09.2021թ-ի թիվ 1613-Ա որոշման հիման վրա «Արդյունաբերական ընկերություն» բաժնետիրական ընկերության հետ կնքված բաժնետոմսերի նվիրատվության պայմանագրի պատճենը։

2021-ի նոյեմբերին հիմնադրամը հարցում էր ուղարկել կառավարություն, սակայն այնտեղից մերժել էին՝ հիմնավորելով, որ առևտրային գաղտնիք է։

Հիշեցնենք, որ այդ պայմանագրով կառավարությունը որպես նվիրատվություն ստացել էր Զանգեզուրի պղնձամոլիբդենային կոմբինատ ՓԲԸ-ի՝ «Արդյունաբերական ընկերություն» բաժնետիրական ընկերությանը պատկանող բաժնետոմսերի 25 տոկոսը։

«Մենք հայցի հիմքում դրել էինք թե Սահմանադրության, թե  «Տեղեկատվության ազատության մասին», թե Քաղաքացիական օրենսգրքի՝ առևտրային գաղտնիքին վերաբերող կարգավորումները, որոնք տվյալ իրավիճակում վկայում են այն մասին, որ այդ պայմանագիրը չի կարող համարվել առևտրային գաղտնիք»,-Panorama.am-ի հետ զրույցում ասաց փաստաբան Գենյա Պետրոսյանը։

Նա հիշեցնում է, որ առևտրային գաղտնիք համարվելու համար պետք է միաժամանակ առկա լինեն երեք պայմաններ՝ տեղեկատվությունը պետք է ունենա իրական կամ հնարավոր առևտրային արժեք երրորդ անձանց անհայտ լինելու փաստի ուժով, պետք է  կողմերը ձեռնարկած լինեն միջոցներ գաղտնիությունը ապահովելու ուղղությամբ, չլինի այդ տեղեկատվությունն օրինական ճանապարհով ստանալու հնարավորություն։

«Բայց այս պարագայում մենք տեսնում ենք, որ կառավարության որոշմամբ արդեն իսկ հրապարակված են պայմանագրի էական կետերը, ուստի հիմք չենք տեսնում այն առևտրային գաղտնիք որակելու համար։ Մենք նաև հղում ենք կատարել Հայաստանի Հանրապետության ստանձնած պարտավորություններին, այդ թվում նաև Արդյունաբերական ճյուղերի թափանցիկության նախաձեռնության շրջանակում, որով պետությունը ստանձնել է բնական պաշարների բաց ու հաշվետու կառավարման, թափանցիկ ու հաշվետվողական գործարար ու պետական համակագերի բնագավառում հստակ պարտավորություններ։ Բացի այդ, Զանգեզուրի պղնձամոլիբդենային կազմակերպությունը որպես հաշվետու կազմակերպություն արդեն իսկ մի շարք տվյալներ հրապարակելու պարտավորություն ունի ու պարբերաբար հրապարակում է։ Այս ամենը հաշվի առնելով մենք խնդրել էինք դատարանին հայցն ապաահովել ու պայմանագիրը տրամադրել։  Երեկ դատարանը հրապարակեց վճռի եզրափակիչ մասը, ըստ որի հայցը բավարարվել է»,-ասաց Գենյա Պետրոսյանը։

Վճիռն ամբեղջությամբ դեռ չի հրապարակվել, այն Դատալեքսում կհրապարակվի ու հայցվոր կողմին կուղարկվի առաջիկա օրերին։ Վճռի հրապարակմանը հաջորդող 30 օրերի ընթացքում  պատասխանող կողմը կարող է բողոքարկել այն։

Փաստաբանը համարում է, որ դատական նիստերի ընթացքում կողմերը հնարավորություն են ունեցել իրենց դիրքորոշումները, ապացույցները հիմնավոր ներկայացնել, լսված լինելու երաշխիքները պահպանվել են։

«Կբողոքարկե՞ն, թե՞ ոչ, չեմ կաող ասել։ Եթե բողոքարկեն, մենք կշարունակենք մեր ներկայացուցչությունը Վերաքննիչ, եթե կարիք լինի նաև Վճռաբեկ դատարանում»,-նշեց հայցվորի ներկայացուցիչը։

Նա հույս ունի, որ պատասխանող պետական մարմինը վճռի՝ օրինական ուժի մեջ մտնելուց հետո սահմանված կարգով ու ժամկետում հայցվոր կողմին կտրամադրի պայմանագրի պատճենը, գործը  Հարկադիր կատարումն ապաահովող ծառայությանը չի հասնի։

Հիշեցնենք, որ «Թրանսփարենսի ինթերնեշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանը հայտարարել էր, որ  Զանգեզուրի կոմբինատի գործարքը թափանցիկ ձևով չի իրականացվել։

«Վարչական դատարան նման հայց ներկայացնելու տրամաբանությունն ընդհանուր առմամբ հանրային վերահսկողության  ապահովումն է  կոմբինատում տեղի ունեցող գործողությունների նկատմամբ։ Տվյալ բնագավառը հանդիսանում է հանրային կարևորություն ունեցող, հանրային հետաքրքրություն ներկայացնող, այդ ոլորտում իրականացվող բոլոր գործընթացները պետք է կատարվեն թափանցիկության սկզբունքով»,-ընդգծեց փաստաբանը։

Մամուլը բազմիցս գրել է այս գործարքի մասին՝ նշել, որ «Արդյունաբերական ընկերություն» ԲԸ-ն նախկինում երբեք Զանգեզուրի պղնձամոլիբդենային կոմբինատի բաժնետերերի թվում չի հիշատակվել։

Բանն այն է, որ իրականում այն բաժնետեր է դարձել հենց 2021թ. սեպտեմբերի 30-ին ու նույն օրն էլ իր ձեռք բերած 60 տոկոս բաժնետոմսերի 25 տոկոսը նվիրել կառավարությանը։

Պարզվում է նաև, որ այս ընկերությունն իր հերթին պատկանում է կոմբինատի բաժնետեր «ԳեոՊրոՄայնինգ Արմենիա» ընկերությանը։