Ձեր վստահելի աղբյուրը

Հունաստանը երբեք չի ճանաչի նոր շրջանների մուտքը Ռուսաստանի կազմ: Այդ մասին հինգշաբթի օրը Կիևում Ուկրաինայի նախագահ Վլադիմիր Զելենսկու հետ բանակցություններից հետո կայացած մամուլի ասուլիսում հայտարարել է Հունաստանի նախագահ Կատերինա Սաքելարոպուլուն։ ՏԱՍՍ-ը հայտնում է, որ Սաքելարոպուլուի հայտարարությունները տարածել է նրա մամուլի ծառայությունը։

Նա նշել է, որ հինգշաբթի իր ներկայությունը Կիևում վկայում է ուկրաինացի ժողովրդին Հունաստանի անբաժան աջակցության և համերաշխության մասին։

«Վստահեցնում եմ ձեզ, որ մենք կշարունակենք դա անել այնքան ժամանակ, որքան անհրաժեշտ կլինի: Մեր դիրքորոշումը հստակ է և անսասան. միջազգայնորեն ճանաչված սահմանների փոփոխությունը ռազմական ուժի կիրառմամբ և անջատման միակողմանի գործողություններով անընդունելի է»,-ասել է Սաքելարոպուլուն:

Նախագահն ասել է, որ չնայած տնտեսության վրա զգալի բացասական ազդեցությանը, Հունաստանն աջակցել է և ամբողջությամբ իրականացնում է Եվրամիության կողմից Ռուսաստանի դեմ սահմանված պատժամիջոցների բոլոր փաթեթները։

«Մենք անվերապահորեն պաշտպանեցինք Եվրախորհրդի որոշումը՝ Ուկրաինային ԵՄ թեկնածու երկրի կարգավիճակ շնորհելու մասին, ուղարկեցինք մարդասիրական օգնություն, ինչպես նաև պաշտպանական տեխնիկա: Մենք ունենք Ալեքսանդրապոլիսի նավահանգիստը, որը տրանսպորտային հանգույց է դաշնակիցների համար, ովքեր ցանկանում են օգնություն ապահովել Ուկրաինային: Եվ մենք անմիջապես արձագանքեցինք տասնյակ հազարավոր Ուկրաինայի քաղաքացիների կարիքներին, որոնք ապաստան են խնդրել մեր երկրում»,-ասել է Սաքելարոպուլուն: