Ձեր վստահելի աղբյուրը

«Իրական խաղաղության հասնելու համար նախ պետք է ապահովել երկրի պաշտպանությունն և անվտանգությունը։ Առանց դրա մնացածն ազգային նվաստացում է, ցեղասպանություն և նոր կապիտուլյացիա»,- Ֆրանսիայի հրապարակում հանրահավաքին հայտարարեց ՀՅԴ ԳՄ ներկայացուցիչ, «Հայաստան» խմբակցության պատգամավոր Իշխան Սաղաթելյանը։

Նրա խոսքով, բոլորը քաջ գիտակցում են՝ իսկապես ծանր վիճակում են, բայց երբ հարցերը դրվում են հստակ, երբ նպատակները լինում են ազնիվ, հաջողությունն անխուսափելի է։

«Ուրեմն՝ ոչ մի վհատվել, ոչ մի հուսահատություն։ Կապիտուլյացիային դիմագրավելու ներուժ մեր ժողովուրդն ունի»,- ընդգծեց նա։ 

Սաղաթելյանը նշեց, կապիտուլյացիան  կարող են կանխել  միայն ազգային համերաշխության դրոշով համահայկական զարթոնքի ալիք բարձրացնելով, և որպես կարևոր հանգրվան՝ ազգային իշխանություն ձևավորելով:

«Ի՞նչ պետք է անի ազգային իշխանությունը և ինչպե՞ս.

1. Հայաստան-Արցախ-Սփյուռք եռամիասնության վերականգնում, համահայկական զորաշարժի իրականացում,

2. պաշտպանության և անվտանգության հրատապ խնդիրների լուծում,

3. կենսական զիջումները բացառելուն ուղղված արտաքին զորակցության ապահովում:

Այս երեք ուղղություններով հետևողական, ամենօրյա տքնաջան աշխատանք պետք է իրականացվի նոր որակի իշխանության կողմից՝ կարող, բանիմաց, նվիրյալ ազգային գործիչների ջանքերի մեկտեղմամբ։ Ուժեղ Հայաստան ունենալու համար մենք պետք է ունենանք ազգային իշխանություն, նոր բանակցող, նոր որակի իշխանություն»,- ասաց նա։

Սաղաթելյանի խոսքով, այս ընթացքում տարբեր քննարկումներ են ունեցել  դիվանագետների, զինվորականների, պրոֆեսիոնալ մասնագետների հետ  և պատասխանատու կերպով հայտարարում են՝ այս երեք կենսական գործողություններն իրականացնելու ռեսուրս հայ ժողովուրդ ունի, «և մենք դա անելու ենք միասին»։

Նա նաև ներկայացրեց, թե ինչպե՞ս պետք է ձևավորվի նոր իշխանությունը և ե՞րբ. «Սրանք ևս հարցադրումներ են որ հնչում են ամեն օր:

Մեզ առաջիկայում սպասվում են շրջադարձային իրադարձություններ, իրադարձություններ, որոնք որոշելու են մեր լինել-չլինելու հարցը։

Հայաստանի ազգային ուժերը հասկանում են պահի օրհասականությունը և ունեն կամք ու պատասխանատվություն կանխելու վերահաս կապիտուլյացիան։

Մենք  ձեռքներս ծալած նստած չենք: Այսօրվա հավաքը ևս դրա ապացույցն է:

Սիրելի հայրենակիցներ

Դուք մեզ տվել եք Արցախը և Հայաստանը պաշտպանելու մանդատ, մենք դա անում ենք, կամքի և  վճռականության պակաս չունենք, բայց վերջնական հաղթանակին հասնելու համար մեզ անհրաժեշտ է  նաև փողոցում ու հրապարակներում հավաքված մարդկանց անհաղթահարելի ուժը։

Այդ ուժը պահովելու է ազգային իշխանության ձևավորումը։ Մենք հստակ պատկերացնում ենք, թե ինչպես պետք է արվի դա: Մենք հիմա խնդիր ունենք անհրաժեշտ և բավարար պայմաններ ապահովելու  և առանց ցնցումների համաժողովրդական պոռթկումով, ճիշտ պահին ազատագրելու մեր երկիրը:

Սիրելի հայեր,

Մեզ պետք է համահայկական զորաշարժ, մեզ  պետք է մեր առաջ քաշած օրակարգին  հանրային լայն և անվերապահ աջակցություն, դա աջակցություն է Հայաստանին և Արցախին, յուրաքանչյուրիս ընտանիքին։ Մենք չենք պայքարում, որ իշխանություն ունենաք։ Մենք պայքարում ենք, որ հայրենիք ունենանք։ Մենք չենք պայքարում, որ մեզանից մեկը վարչապետ դառնա։ Մենք պայքարում ենք, որ Հայաստանը լինիև առհասարակ վարչապետ ունենա:

Հետևաբար, մեր պայքարը նահանջ չի ճանաչում, մենք համակերպվող, հուսահատվող տեսակ չենք, գնալու ենք մինչև վերջ»։

Նա նշեց, որ իրենք  ընդունել և ընդունում են բոլոր առողջ և սրտացավ քննադատությունները, իրենց սխալներից և բացթողումներից դասեր քաղել են, այլևս վրիպելու և չհաջողելու տեղ չունեն:

«Սա իսկապես ծանր, բայց կենսական պայքար է։ Մեր երկրի ճակատագիրը որոշվելու է այս հրապարակում և բոլոր այլ հրապարակներում պայքարող մարդը։

Ոչ մի թղթի կտոր չի երաշխավորելու մեր ինքնիշխանությունը, մեր անվտանգությունը, խաղաղ ու  արժանապատիվ ապրելու մեր իրավունքը։ Ոչ մի երկիր պարտավոր չէ և չի պաշտպանելու մեզ, եթե ինքներս մեզ չպաշտպանենք։ Ոչ մի դաշնակից մեր շահերը չի պաշտպանի, եթե մենք ինքներս այդ շահերը չենք գիտակցում և չգնանք այդ շահերց հետևից։ Ժամանակն է մեզ վերագտնելու, մեր ուժերին հավատալու, մեր ինքնավստահությունը նորոգելու։ Մեր միասնությունը վերակերտելու հրամայականի առջև ենք։

Դեռ Դարեհ առաջինն է ասել՝ հայերին հնարավոր չէ հաղթել, նրանց պետք է պառակտել: Մեզ պառակտեցին և տարան պարտության։

Այսօր մենք այստեղ՝ այս խորհրդանշական հրապարակում, մեկ անգամ ևս համերաշխության այս հանրահավաքում, ձեզանից յուրաքանչյուրն ասաց՝ մենք կարող ենք միանալ, բռունցք դառնալ և տեր կանգնել մեր հայրենիքին»,- ասաց Իշխան Սաղաթելյանը։