Ձեր վստահելի աղբյուրը

Իսլամական հեղափոխության պահապանների կորպուսի օդատիեզերական ուժերը հաջողությամբ ուղեծրային տիեզերք են արձակել Ghaem 100 հրթիռակիրը։ Այս մասին գրում է Jnews-ը՝ հղում անելով Mehr լրատվական գործակալությունը։

Փորձնական արձակումն իրականացվել է շաբաթ օրը՝ Իսլամական հեղափոխության պահապանների կորպուսի (ԻՀՊԿ) օդատիեզերական ուժերի հրամանատար, բրիգադային գեներալ Ամիր Ալի Հաջիզադեի եւ երկրի զինված ուժերի մի խումբ պաշտոնյաների ներկայությամբ։

Եռաստիճան պինդ շարժիչով Ghaem 100-ն ի վիճակի է 80 կիլոգրամանոց արբանյակներ արձակել երկրի մակերեւույթից 500 կիլոմետր հեռավորության վրա գտնվող ուղեծիր. մոտ ապագայում «Նահիդ» արբանյակը ուղեծիր դուրս կբերվի Ghaem 100 կոշտ շարժիչային արբանյակային կրիչի միջոցով:

Իսլամական հեղափոխության պահապանների կորպուսը արձակել է իրանական «Նուր I»  առաջին ռազմական արբանյակը 2020 թվականի ապրիլին։ Մարտին, Իսլամական հեղափոխության պահապանների կորպուսի օդատիեզերական ուժերը, Երկրի ցածր ուղեծիր են արձակել իրենց երկրորդ ռազմական արբանյակը, որը կոչվում է «Նուր II»: Արբանյակը արձակվել է եռաստիճան արբանյակային կրիչի միջոցով, որը կոչվում է Qassed:

Մինչդեռ, ԱՄՆ Պետդեպարտամենտը դժգոհություն է հայտնել իրանական հրթիռակիր հրթիռի արձակման կապակցությամբ՝ ասելով, որ «նման արձակումները իրավիճակի ապակայունացման են հանգեցնում»։ Ինչպես հայտնում է ՏԱՍՍ լրատվական գործակալությունը՝ Պետդեպարտամենտի մամուլի ծառայությանը հղում տալով, ԱՄՆ-ը մտավախություն ունի, որ տիեզերական արձակման մեքենաների զարգացման ծրագիրը կարող է օգտագործվել «միջուկային մարտագլխիկների արձակման համար»։

Ըստ Պետդեպարտամենտի՝ ​​իրանական հրթիռների փորձնական արձակումները «հակասում են ՄԱԿ-ի Անվտանգության խորհրդի 2231 բանաձեւին, որը Իրանին կոչ է անում միջուկային զենք կրելու ունակ բալիստիկ հրթիռների հետ կապված որեւէ գործունեություն չձեռնարկել, այդ թվում՝ բալիստիկ հրթիռների տեխնոլոգիայի կիրառմամբ արձակումներ»։