Ձեր վստահելի աղբյուրը

«Նախատեսվում էր ցորենի ցանքատարածություններն ավելացնել մինչև 75 հազար հեկտար, սակայն Ադրբեջանի ագրեսիայի պատճառով այս տարածքներում անվտանգության նկատառումներով նկատվում են ցորենի մշակման ցածր ակտիվություն»,-ԱԺ-ում 2023 թ. ՀՀ բյուջեի նախագծի քննարկման ժամանակ հայտարարեց էկոնոմիկայի նախարար Վահան Քերոբյանը և պարզաբանեց, որ Գեղարքունիքի և Սյունիքի մարզերում են հիմնականում զերծ մնացել ցանքից, որը խոչընդոտ է հանդիսանում նշված ցուցանիշի ապահովմանը:

Նա նաև հայտնեց, որ անասնաբուծության ճյուղում էլ կառավարությունը մշակել և իրականացրել է խոշոր ներդրումային ծարագիր, որի համար 2023 թվականին նախատեսում է հատկացնել 3.5 մլրդ դրամ, որը հնարավորություն կտա բարձրացնել անասնապահական մթերքների ինքնաբավարարվածության մակարդակը:

Հիշատակելով 2022 թվականին իրականացրած անասնապահական ծրագրի հաջողությունները՝ Քերոբյանն ասաց. ««Երեմյան փրոջեկտ» ընկերությունը կարողացավ ապահովել ամբողջական ֆինանսավորում Տաշիր համայնքում խոշոր անասնապահական համալիրի կառուցման համար՝ ներգրավելով մոտավորպես 32 մլն դոլար, որը մասնակիորեն օժանդակված է նաև մեր կողմից ներդրված ծրագրով»:

Նրա խոսքով՝ այդ խոշոր անասնապահական համալիը միայնակ Հայաստանում միջին կաթնատվության մակարդակը 1%-ով կբարձրացնի:

Էկոնոմիկայի նախարարը խոստովանեց, որ դեռևս չեն կարող ասել, որ գյուղատնտեսությանն անհրաժեշտ համամասնորեն են ֆինանսավրվում և այն համեմատելի չէ ԵՄ երկրների կողմից իրենց գյուղատնտեսության ոլորտներին հատկացվող չափաբաժնիններից: