Ձեր վստահելի աղբյուրը

Աճող ջերմաստիճանի ծայրահեղությունները, անտառային հրդեհները, երաշտներն ու ջրհեղեղները կլիմայի տաքացման արդյունք են: Այս մասին գրում է euronews-ը։

Ըստ ՄԱԿ-ի նոր զեկույցի, համաձայն որի՝ աշխարհը խորը կլիմայական ճգնաժամի մեջ է, վերջին ութ տարիները կլինեն ռեկորդային ամենաշոգը:

Եգիպտոսում կլիմայի 27-րդ համաժողովի բացման ժամանակ ՄԱԿ-ի գլխավոր քարտուղար Անտոնիո Գուտերեշը կոչ է արելց շտապ քայլեր ձեռնարկել, քանի որ  մոլորակը աղետի ազդանշան է ուղարկում։

«Ինչպես արձանագրել է Համաշխարհային օդերևութաբանական կազմակերպությունը, բոլոր մայրցամաքներում կլիմայի փոփոխությունները տեղի են ունենում աղետալի արագությամբ՝ ոչնչացնելով կյանքեր և կենսաապահովման համակարգեր: Մենք պետք է արձագանքենք մոլորակի աղետի կոչին գործողություններով, որոնք պետք է լինեն  հավակնոտ։ Եվ դրա տեղը COP27 համաժողովն է, ժամանակը հիմա է»,- ասել է ՄԱԿ-ի գլխավոր քարտուղար Անտոնիո Գուտերեշը։

Աշխարհի ավելի քան 120 առաջնորդներ մասնակցում են ՄԱԿ-ի Կլիմայի 27-րդ համաժողովին։ Երկուշաբթի օրվանից նրանք կսկսեն հինգ րոպեանոց ելույթներ տալ, թե ինչ են ակնկալում հանդիպումից:

Զարգացած երկրների համար երկու հիմնական նպատակն է նվազեցնել ջերմոցային գազերի արտանետումները և արագացնել անցումը դեպի վերականգնվող էներգիայի աղբյուրներ: Մինչ զարգացող երկրները, որոնք կլիմայի փոփոխության դեմ պայքարի առաջնագծում են, ցանկանում են տեսնել նախկին ֆինանսավորման պարտավորությունների կատարումը: