Ձեր վստահելի աղբյուրը

ԱԺ Պետական-իրավական հարցերի մշտական հանձնաժողովի նիստում ՔՊ-ական պատգամավոր Գևորգ Պապոյանը ներկայացրած իր հեղինակած «Օտարերկրացիների մասին» օրենքում լրացում կատարելու մասին նախագիծը։

Նախագծի համաձայն, օրենքի այսօրվա կարգավորումն անհարկի բարդություններ է առաջացնում օտարերկրյա իրավաբանական անձանց համար ՀՀ-ում ստեղծված մասնաճյուղերի միջոցով գործունեություն իրականացնելու համար, ինչն իր հերթին խոչընդոտ է հանդիսանում ՀՀ-ում օտարերկրյա ներդրումների ներգրավվման և արդեն իսկ գոյություն ունեցողների խթանման համար:

Պապոյանի ներկայացմամբ, «Օտարերկրացիների մասին» ՀՀ օրենքի 23-րդ հոդվածի 1-ին մասի համաձայն՝ առանց աշխատանքի թույլտվության Հայաստանում կարող են աշխատել օտարերկրյա պետության առևտրային կազմակերպությունների աշխատակիցները՝ Հայաստանում տեղակայված այդ կազմակերպությունների ներկայացուցչություններում աշխատելու նպատակով:

«Նշված նորմի տառացի մեկնաբանման արդյունքում պարզ է դառնում, որ օտարերկրացիները կարող են աշխատել առանց թույլտվության միայն օտարերկրյա իրավաբանական անձի ՀՀ-ում տեղակայված ներկայացուցչությունում: Մինչդեռ, օտարերկրյա իրավաբանական անձի Հայաստանում տեղակայված մասնաճյուղում աշխատելու համար նման արտոնություն նախատեսված չէ:

Օրենքի համապատասխան կետը տառացի մեկնաբանման արդյունքում խտրական մոտեցում է ցուցաբերվում օտարերկրյա իրավաբանական անձանց մասնաճյուղի և ներկայացուցչության նկատմամբ՝ վերջինիս համար սահմանելով ավելի բարենպաստ պայմաններ իրավաբանական անձի աշխատակիցներին ՀՀ-ում աշխատանքի ներգրավելու հարցում:

Կարծում ենք, որ անհրաժեշտ է օրենքում ավելացնել մասնաճյուղեր բառը, դրա հետ կապված նույնիսկ ունենք ՍԴ իրավական դիրքորոշումն անձի նկատմամբ խտրական վերաբերմունքի վերաբերյալ»,- ասաց պատգամավորը։

Պապոյանի խոսքով, համադրելով, ըստ էության, նշված դիրքորոշումը նաև մեր տնտեսական  առաջնահերթությունների, ներկա աշխարհաքաղաքական իրավիճակի հետ, նաև գործարարության խթանման հարց է, քանի որ տարբեր միջազգային կազմակերպություններ այստեղ  բիզնես են նախաձեռնում, մի մասը ներկայացուցչության միջոցով, մի մասը մասնաճյուղի. «Եթե  մասնաճյուղերով են նախաձեռնում, ըստ էության, խնդրի առաջ են կանգնում իրենց աշխատակիցների հետ կապված, ովքեր պետք է դրսից գան ու այստեղ աշխատեն։ Նման խտրական և տարբերակված մոտեցումը որևէ օբյեկտիվ հիմքից զուրկ է, իրավաչափ չէ, քանի որ  ներկայացուցչության և  մասնաճյուղի իրավական կարգավիճակը, ըստ էության, գրեթե նույնական է»։

Այս փոփոխությամբ առաջարկվում է  օրենքի համապատասխան կետում «այդ կազմակերպությունների» բառերից հետո լրացնել «մասնաճյուղերում կամ» բառերը:

Հարակից զեկուցող ՀՀ միգրացիոն ծառայության պետի տեղակալ Իրինա Դավթյանն ասաց, որ իրենց դիրքորոշումը դրական է։

«Մենք ևս համարում ենք, որ միանգամայն տրամաբանական է, որ եթե  ներկայացուցչության աշխատողն ազատված է  աշխատանքի թույլտվության պահանջից, ապա մասնաճյուղում աշխատողները ևս պետք է ազատված լինեն»,- նշեց նա։

Հանձնաժողովի անդամները, ի դեպ միայն ՔՊ-ականներն են մասնակցում, միաձայն կողմ քվեարկեցին նախագծին։ Այս նախագիծը կընդգրկվի ԱԺ գալիք նիստերի օրակարգում։