Ձեր վստահելի աղբյուրը

Շատ-շատերի համար 2020 թվականի նոյեմբերի 9-ը օրացույցում այն օրն է, որը ցանկանում են ամեն գնով ջնջել։ Ջնջել ու մոռանալ ցավալի, խայտառակ պարտությունը,  ջնջել ու մոռանալ հազարավոր տղաների արյան գնով պահած հողերի հանձնումը, ջնջել ու մոռանալ…

Panorama.am-ը հարցում անցկացրեց քաղաքացիների շրջանում, արդյո՞ք հիշում են 2020 թվականի նոյեմբերի 9-ն ու ինչպե՞ս կգնահատեն դրանից հետո ստեղծված իրավիճակը։

«Ուզում եմ, որ այս թիվն ընդհանրապես չլինի։ Պատերազմի հետ կապված անձնական ցավ ունեմ։ 2020 թվականի նոյեմբերի 9-ից ժամանակը կանգնած է, չի անցել ոչ մի բան, ոչ ցավն է մեղմացել, ոչ ելակենտներն են հասկանալի, ոչ իրավիճակն է  հուսադրող։

Ինձ համար այս օրը չկա, կյանքը կանգ է առել»,- նշում է քաղաքացին։

Քաղաքացիներից մեկի համոզմամբ, պետք է ամեն գնով զինել բանակը, որպեսզի կորցրածը հետ բերվի, որպեսզի երեխաների արյունն անիմաստ չկորի։

«Դժվար օր է այսօր, մեր պարտության օրն է, բայց պետք է հետևություններ անել ու դասեր քաղել։ Պետք է սովորենք առաջ գնալ, փորձենք երկիրը երկիր դարձնենք, որ կարողանանք ապահովել մեր ժողովրդի բարեկեցությունը, երկրի մարտունակությունը։ Իհարկե, առանց ռևանշի հնարավոր չէ այս երկիրը երկիր դարձնել»,- ասում է Գալուստ Սարգսյանը։

Մեկ այլ քաղաքացու կարծիքով, Հայաստանը պարտություն չի կրել 44-օրյա պատերազմում,  որովհետև մեր երեխաները, տղաները կռվել են, պայքարել են, չեն հանձնվել։

«Այդ ամենը դավադրություն  էր հայերի նկատմամբ»,- ասաց քաղաքացին։

Հարցման ընթացքում նաև հնչեցին կարծիքներ, որ այս խայտառակ պարտության պատճառը Նիկոլ Փաշինյանն է։ Նրանք համոզված են, որ ժողովուրդը պետք է ըմբոստանա, ոտքի կանգնի ու «դրան քշի»։

Եղան քաղաքացիներ, ովքեր չցանկացան տեսախցիկի առաջ խոսել, բարձրաձայնել իրենց ցավը, ցավը, որը երբեք չի մոռացվի, ցավը, որն օր-օրի ավելի է խորանում, քանի որ օր-օրի երկիրը մեկ քայլ առաջ է գնում դեպի անդունդը։

Սակայն, ցավալին այն է, որ երիտասարդները, մասնավորապես ուսանողները, նույնիսկ չեն էլ հիշում, թե այսօր ինչ օր է։ Իսկ երբ նրանց հիշեցնում ենք՝ նոյեմբերի 9-ը, հիշեցնում, 2020 թվականի նոյեմբերի 9-ի մասին, կրկին, նրանց ոչինչ չի ասում այդ ամսաթիվը։