Ձեր վստահելի աղբյուրը

«Գորսից դեպի Որոտան, Բարձրավան, Շուռնուխ տանող այլընտրանքային ճանապարհն ադրբեջանական ուղիղ թիրախի ներքո է գտնվում, և պետք է ոչ թե գովերգել այս ճանապարհն ու ասել՝ Սյունքին անվտանգ է, այլ ադրբեջանական զինված ծառայողներին հեռացնելու ուղղությամբ քայլեր ձեռնարկել», - ասուլիսում ասաց Իրավունքի և արդարության կենտրոն «Թաթոյան» հիմնադրամի տնօրեն, ՀՀ նախկին ՄԻՊ Արման Թաթոյանը։

Նա նշեց, որ հատուկ մեքենա է հատկացված, որ Գորիսից Որոտան, Շուռնուխ, Բարձրավան ուսուցիչներ տեղափոխի։

«Ուսուցիչները  ստիպված ժամը ութին դուրս են գալիս Գորիսից, երեկոյան ութին նոր տուն են հասնում։ Ուսուցիչների հետ կապված այլ խնդիր էլ կա.  ճանապարհածախսի հատուցման համար յուրաքանչյուր ուսուցիչ ամսական ստանում է 20 հազար 200 դրամ, եռամսյակային են ստանում, այս տարվա ուսումնական տարվա համար դեռ չէին ստացել։ 

Այստեղ  խնդիրը նաև այն է, որ ուսուցիչները վարձրատրվում են ըստ աշակերտների քանակի։ Օրինակ, Շուռնուխում ընդամենը 17 աշակերտ կա,  Բարձրավանում՝ 8, Որոտանում՝ 45։
Բարձրավանի դպրոցում ուսուցիչների պակաս կա։ Հենց նույն դպրոցում Ինֆորմատիկայի դասաժամերը կազմում են այնքան, որ ուսուցչի աշխատավարձը կազմում է 16 հազար դրամ»,- ասաց Ա.Թաթոյանը։

Նա նշեց, որ Կապան-Ճակատեն այլընտրանքային ճանապարհը կառուցվել է ադրբեջանական անմիջական դիտարկման ներքո. «Եթե այս հատվածը դիտարկվում է, այդ այլընտրանքային ճանապարհի կառուցման իմաստը ո՞րն է։ Առավել ևս, որ համայնքապետարանի կողմից առաջարկ է եղել  առնվազն երկու տեղով տանել ճանապարհը, համեմատաբար առավել անվտանգ է։

Այս ճանապարհը 5-6 գյուղերը կապող կենսական ճանապարհ է»։ 

Արման Թաթոյանն ասաց նաև, որ Կապանի օդանավակայանն ու Մ2 մայրուղին ադրբեջանական զինված անօրինական դիրքերի թիրախի ներքո են։

«Նրանք իրենց զինված տեղակայումներով սպառնում են, որ  մենք չկարողանանք օդանավակայանը օգտագործենք, բայց այն քաղաքացիական օդանավակայան է, և Կապանը կապում է արտաքին աշխարհի հետ։ Մենք կարող ենք  լիարժեք օգտագործել անգամ եթե նրանք այստեղ են, բայց  ուղիղ սպառնալիք կա, որ եթե Հայաստանը շահագործի այս օդանավակայանը, բնականաբար, քաղաքացիական օդանավերին հարձակման կենթարկեն»,- ասաց «Թաթոյան» հիմնադրամի տնօրենը։

Նա նաև նշեց, որ Սև լճի հարևանությամբ ևս մի փոքր լիճ՝ Ջիլի լիճ, որտեղից մարդիկ իրենց կեդանիների համար ջուր են վերցնում։

«Այս պահին մեր գյուղերում ջրի հասանելիության լրջագույն խնդիր կա նաև հենց դրա հետևանքով»,- ընդգծեց Արման Թաթոյանը։

Նա նաև տեղեկացրեց, որ սեպտեմբերի 13-14-ի ադրբեջանական հարձակումների հետևանքով Իշխանասարի՝ միայն Ջերմուկի հատվածում թշնամին հափշտակել է մեր քաղաքացիներին պատկանող 4 մարդատար «Նիվա» մակնիշի մեքնեա,  3 բեռնատար մեքենա, մինչև 6000-ի հասնող ոչխարներ։ Միայն մեկ քաղաքացու պատկանող 1300 ոչխար են գողացել։

«Այսինքն, ադրբեջանական զինված ծառայողները ոչ միայն իրենց ներկայությամբ են խնդիրներ առաջացնում, այլ  ակտիվ գործողություններով են դա անում»,- ասաց նա։

Այնուհետև նա հարցադրում արեց, թե այս պայմաններում, այսքան զինված ուժեր ունենալու դեպքում որևէ մեկը կարծում է, որ  նրանք խաղաղությա՞ն են պատրաստվում։

«Նրանք մեր քաղաքացիների կյանքը վերածել են անհնարինության, մեր քաղաքացիները ադրբեջանցի զինծառայողների պատճառով չեն կարողանում ընտանիքի կարիքները հոգալ, եկամուտ վաստակել»,- ասաց Արման Թաթոյանը՝ ընդգծելով, որ նրանց հեռացնելու համար ունեն հիմքեր, կա միջազգային իրավաբանություն։

«Ամենակարևորը՝ պետք է հավաքել փաստեր ու կարողանալ աշխատել այդ փաստերով, փաստերը դնենք մեր պահանջների հիմքում, օգտագործենք միջազգային մեխանիզմները։ Հակառակ դեպքում մենք ընդամենը դառնում ենք աշխարհաքաղաքական շահերի գերի։ Հատկապես փոքր պետությունների համար են միջազգային մեխանիզմները, իսկ այդ մեխանիզմներն օգտագործելու հնարավորություն մեր ունեցած փաստերը, հիմքերը տալիս են։ 

Մենք ոչ թե սկզբից պետք է ասեինք, հիմա էլ առանձին պաշտոնյաներով, թե ամեն ինչ օրինակ է, իրենց տարածքներն են, այլ փորձեինք ներկայացնել այս խախտումները»,- ասաց Արման Թաթոյանը։