Ձեր վստահելի աղբյուրը

Հայաստանը Ռուսաստանին կապող ցամաքային ճանապարհը, որն անցնում է Հյուսիսային Օսիայի Վերին Լարսի անցակետով, պարբերաբար խնդիրներ է ստեղծում հայ բեռնափոխադրողների համար։ Այսօր էլ Վերին Լարսում մեքենաների հերթը կիլոմետրերով ձգվում է։ Պատճառը, ինչպես ասում են բեռնափոխադրողները, Ղրիմի կամրջի պայթյունից հետո անցակետում ուժեղացված հսկողությունն է։ Մինչ այդ, հերթեր գրեթե չկային, կամ եթե լինում էին, շատ քիչ։

Panorama.am-ի թղթակցի հետ զրույցում «Սպայկա» ընկերության դիսպետչերական բաժնի ղեկավար Կարեն Աղդայանն ասաց, որ ընկերությունը լուրջ վնասներ է կրում և դեռ հայտնի չէ, թե որքան կտևի այս իրավիճակը։

Նա նշեց, որ այս պահին «Սպայկա» ընկերության մոտ 160 մեքենա Վրաստանում է։ «Արդեն մեկ շաբաթ է կանգնած են ու ոչ մի շարժ չկա, մի քանի մեքենա էլ վերադարձել է, քանի որ անիմաստ է այդքան երկար կանգնել, քանի որ ՌԴ հասնելուց հետո բեռը կարող է չընդունեն, քանի որ այն արդեն պիտանի չէ»,- ասաց նա։

Կարեն Աղդայանի խոսքով՝ խնդիրն այն է, որ այսօր բոլոր մեքենաները պարտադիր ռենտգեն հետազոտություն են անցնում, ինչը բավականին ժամանակատար գործընթաց է։ Արդյունքում՝  Վրաստանով բեռներ փոխադրելը տևում է 17-18 օր՝ նախկին մեկ օրվա փոխարեն։ 

Ըստ նրա՝ անցակետի թողանակությունը նվազել է, ներկայում Լարսում օրական սպասարկում են առավելագույնը 300 բեռնատար մեքենա, իսկ նախկինում դա հասնում էր 500-ի։ «Մեր հաշվարկներով՝ Վրաստանում ընդհանուր առմամբ մոտ 3 հազար մեքենա կա կանգնած։ Մենք հասկանում ենք, որ կան օբյեկտիվ պատճառներ, հնարավոր չէ այդքան շատ մեքենաներ սպասարկել, բայց պետք է խնդրի համար ինչ-որ մի լուծում գտնել։ Եղանակային պայմանների պատճառով՝ հատկապես ձմռանը, ավելի վատ կլինի, մի քանի անգամ վատ»,- նշեց «Սպայկա» ընկերության ներկայացուցիչը։

Նա նաև հայտնեց, որ վերջին մեկ շաբաթում վարունգով բեռնված երեք բեռնատար Լարսից վերադարձել է, որից մեկը՝ մոտ 20 տոննա, ամբողջությամբ աղբ են թափել։ Մյուս երկու մեքենաներում եղած վարունգն էլ եթե վաճառեն ներքին շուկայում, ապա ինքնարժեքից մի քանի անգամ ցածր գնով։ 

«Արտահանումն արդեն կրճատվել է, եթե նախկինում 10-15 մեքենա բեռ արտահանում էինք, ապա այսօր՝ 3-4 մեքենա»,- նշեց նա՝ հավելելով, որ առաջիկա եղանակային վատ պայմանների պատճառով խնդիրը կսրանա։ Նոյեմբեր-դեկտեմբերը պիկային շրջան է, բայց եթե այս վիճակը շարունակվի, ապա ավելի մեծ կորուստներ կունենանք և արտահանման ծավալները կնվազեն։ Բնական է, որ ընկերությունը լուրջ խնդիրների առաջ է կանգնելու»,- ասաց Կարեն Աղդայանը։

Նա նաև նշեց, որ Տարածքային կառավարման և ենթակառուցվածքների նախարարությունից հայտնել են՝ վրացի կոլեգաների հետ քննարկում են իրավիճակը։ «Մեզ մնում է միայն սպասել, Վերին Լարսի անցակետում միայն հայ բեռնափոխադրողները չեն, բայց պետք է այս խնդրին լուծում տրվի, հակառակ դեպքում բեռնափոխադրողները լուրջ խնդիրների առաջ կկանգնեն»,- ասաց Կարեն Աղդայանը։

Նշենք, որ Վերին Լարսին այլընտրանք ստեղծելու կարևորության մասին կառավարությունը բարձրաձայնում է, երբ բեռնափոխադրողները կանգնում են փաստի առաջ։ Իշխանությունները՝ որպես Լարսի ցամաքային ճանապարհին այլընտրանք, խոսում են լաստանավի գործարկման մասին, սակայն դա այդպես էլ չի իրականանում: