Ձեր վստահելի աղբյուրը

«Խաղամոլության խնդիրը  լուծելու համար շատ ջանք է պետք, մենք բավականին ջանք թափում ենք, բայց դեռ պետք է աշխատենք այդ ուղղությամբ»,-ԱԺ-ում ելույթ ունենալով «Տեսալսողական մեդիայի մասին» օրենքում լրացումներ կատարելու և «Գովազդի մասին» օրենքում փոփոխություններ կատարելու մասին օրենքների նախագծերի քննարկման ժամանակ՝ ասաց ՔՊ-ական պատգամավոր Հովիկ Աղազարյանը:

Նախագծերի համահեղինակ Գևորգ Պապոյանը մինչ այդ հայտնեց, որ դրանք այն մասին է, որ տեսալսողական մեդիա միջոցներում չի կարող լինել այնպիսի մեդիա միջոց, որի անվանումը կապ ունի շահումով խաղի, օնլայն կամ ոչ օնլայն կազինոյի, վիճակախաղի հետ:

«Սա նշանակում է, որ այդ մեդիա միջոցները ոչ թե պետք է փակվեն, այլ փոխեն իրենց անվանումը: Գործողներն իրենց անվանումը պետք է փոխեն 6 ամսվա ընթացքում, նորերը այդպիսի անվանումներով չեն կարող ստանալ հեռարձակման թույլտվություն»,-ասաց Պապոյանը:

Հայտնելով, որ նախագիծը տեղավորվում է խաղամոլության դեմ պայքարի շրջանակու՝ նախագծի հեղինակն ասաց, որ եթե թույլ չի տրվում օնլայն շահումով խաղերի, վիճակախաղերի գովազդը, ապա անթուլատրելի է նաև, որ որևէ մեդիա միջոցի անվանում մարդկանց մոտ ասոցացվի խաղատան, շահումով խաղի հետ:

Հովիկ Աղազարյանն իր անձնական օրինակը ներկայացրեց, որպեսզի ցույց տա խնդրի բարդությունը:

«Ասենք՝ թոռնիկներիս հետ գնում եմ զբոսայգի՝ զբոսնելու: Այնտեղ կա, այսպես կոչված «Շահումով խաղ» հասկացողությունը՝ կրակելը և այլ խաղերը: 1000 դրամ են ծախսում երեխաները, շահում են 200-300 դրամ: Եթե տեսնեք, թե նրանց չարաճճի աչքերն ինչպես են փայլում այդ շահումից: Ասում եմ՝ տղա ջան, դու 1000  դրամ ծախսեցիր՝ 200 դրամ շահեցիր, ի՞նչն է այստեղ շահումը, չէ որ քեզ բառիս բուն իմաստով խաբում են, ներ են գրավում խաղամոլության մեջ»,-ներկայացրեց Աղազարյանը:

Պատգամամվորը փաստեց, որ կարող է պարզունակ լինի թեման, բայց այն այդպես չէ, քանի որ այդտեղից է սկսվում խաղամոլությունը:

«Ասեմ, որ իմ թոռնիկները բավականին ձիգ, լավ սովորող, բարձր առաջադիմությամբ տղաներ են, բայց երբ ես իրենց աչքերի փայլին եմ նայում, արդեն պատկերացնում եմ այն մարդկանց, որոնք 10000 դրամ փող են ստանում և երեկոյան տուն գնալուց ասում են՝ մի հատ մտնենք, կամ դնենք՝ այդ 10000-ը դարձնենք 100000, բայց այդ 10000-ն էլ են կորցնում»,-ասաց Հովիկ Աղազարյանը և հայտնեց, որ առաջիկայում հանդես կգա օրենսդրական նախաձեռնությամբ նման միջոցառումները կարգավորելու համար: