Ձեր վստահելի աղբյուրը

Ազգային ժողովում պաշտպանության նախարար Սուրեն Պապիկյանը ներկայացրեց «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացումներ կատարելու մասինև  «Զինվորական ծառայության և զինծառայողի կարգավիճակի մասին» օրենքում փոփոխություններ և լրացումներ կատարելու մասին օրենքների նախագծերի փաթեթն առաջին ընթերցմամբ ընդունելու մասին հարցը։ 

Նրա ներկայացմամբ, նախագծով առաջարկվում է մարտական խնդիրների իրականացման, պլանավորման կամ վերահսկման գործառույթներ ունեցող պաշտոններ զբաղեցնող պայմանագրային զինվորական ծառայության սպայական, ենթասպայական և  շարքային կազմերի զինծառայողների համար սահմանել հավեալավճար և դրա հաշվարկումն պլանավորել այդ զինծառայողների կողմից ատեստավորում անցնելու հանգամանքով։ 

«Նախագծերի համաձայն, հավելավճար հաշվարկելու նպատակով անցկացվող ատեստավորմանը  մարտական խնդիրների ու դրանց իրականացման, պլանավորման կամ վերահսկման գործառույթներ ունեցող պաշտոններ  ներկայում զբաղեցնող պայմանագրային զինծառայողները մասնակցելու են կամավոր»,- ասաց նախարարը։

Զինվորական պաշտոնների յուրաքանչյուր խմբում նախատեսված և մարտական խնդիրների իրականացման, պլանավորման կամ վերահսկման գործառույթներ ունեցող պաշտոն առաջին անգամ զբաղեցնող պայմանագրային զինվորական ծառայության սպայական, ենթասպայական և շարքային կազմերի զինծառայողները ենթակա են ատեստավորման պաշտոնը զբաղեցնելու օրվանից ոչ շուտ, քան երեք ամիս հետո եւ ոչ ուշ, քանի չորրորդ ամիսը լրանալու օրը, որի արդյունքներով հավելավճար ստանալու իրավունք ձեռք բերելու դեպքում հավելավճարը հաշվարկվում է պաշտոնի նշանակման օրվանից: Ատեստավորման արդյունքներով  հավելավճար ստանալու իրավունք ձեռք չբերած զինծառայողները կարող են  կրկնակի ատեստավորում անցնելու համար դիմել տարեկան ոչ ավելի, քան երկու անգամ, որի արդյունքներով հավելավճար ստանալու իրավունք ձեռք բերելու դեպքում հավելավճարը հաշվարկվում է այդ իրավունքի  ձեռք բերման օրվանից։

Զբաղեցրած մարտական խնդիրների իրականացման, պլանավորման կամ վերահսկման գործառույթներ ունեցող պաշտոնում ատեստավորված ևտվյալ պաշտոնի խմբի համար սահմանված չափով հավելավճար ստացող պայմանագրային զինվորական ծառայության սպայական, ենթասպայական և շարքային կազմերի զինծառայողները ենթակա են ատեստավորման յուրաքանչյուր երեք տարին մեկ անգամ՝ հավելավճարի հաշվարկումը շարունակելու համար:

Ատեստավորման կարգը և մարտական խնդիրների ու դրանց իրականացման, պլանավորման կամ վերահսկման գործառույթների շրջանակը, հավելավճարների  չափերը և վճարման կարգը սահմանվում է Հայաստանի կառավարության որոշմամբ: Մարտական խնդիրների իրականացման, պլանավորման կամ վերահսկման գործառույթների շրջանակի հիման վրա համապատասխան գործառույթներ ունեցող զինվորական պաշտոնների անվանացանկը, հավելավճարի հաշվարկման և դադարեցման կարգը սահմանում է Հայաստանի պաշտպանության նախարարը:

Սուրեն Պապիկյանը հայտարարեց, որ իրենք ունեն հաշվարկներ, թե որքան աշխատավարձի մասին է խոսքը՝ մարտական ծառայության շարքային պայմանագրայինի համար միջինը 316 հազար մաքուր աշխատավարձ, իսկ եթե մարտական հերթապահություն է անցնում, դրան զուգահեռ ավելանում է ևս 80 հազարով։

«Շուրջ 380 հազար դրամի մասին է խոսքը»,- ասաց Պապիկյանը։