Ձեր վստահելի աղբյուրը

«Ընդդիմությունը միշտ ԱԺ-ում է եղել, «Հայաստան» խմբակցությունն այս ժամանակահատվածում ԱԺ-ում աշխատել է իր օրակարգով»,-ԱԺ-ում ճեպազրույցի ժամանակ ասաց «Հայաստան» խմբակցության ղեկավար Սեյրան Օհանյանը։

Նա հիշեցրեց, որ ընդդիմությունը բազմիցս հայտարարել է, որ գործող  իշխանությունները նաև՝ օրենսդիրը, ԱԺ-ում իրական իրավիճակից կտրված քննարկումներ են իրականացնում:

Օհանյանը հիշեցրեց, որ ընդդիմադիր պատգամավորների բազմաթիվ  նախաձեռնություններ, որոնք վերաբերվել են անվտանգությանը, Արցախին և այլ հարցերի, իշխանությունների կողմից մերժվել են:

«Իրավիճակից զերծ որոշումների ընդունումը բերում է այնպիսի վիճակի, որում մեր երկիրն է այսօր գտնվում»,-հայտնեց «Հայաստան» խմբակցության ղեկավար:

«Եթե 2020-ի նոյեմբերի 9-ի փաստաթուղթը մեր հանրությունն անվանում է կապիտուլյացիոն փաստաթուղթ Արցախի համար, ապա այդ  կապիտուլյացիոն գործընթացները շարունակվում են Հայաստանում, որովհետև կուրորեն կամ միտումնավոր ՀՀ իշխանությունները գնում են կեղծ խաղաղության օրակարգի»,-հայտարարեց ընդդիմադիր պատգամավորը:

Նա հայտնեց, որ այդ իրավիճակը ստիպել է, որ ընդդիմադիր խմբակցությունները գործունեությունը շարունակեն փողոցում և,այնտեղ գեներացնելով ժողովրդի պայքարի ոգին, նաև միջազգային հանրությանը ցույց տվեցին, որ Հայաստանի ժողովուրդն ի վիճակի է շարունակել պայքարն իր ինքնության համար:

«Երրորդ՝ եթե ժամանակավրեպ ինչ-որ փաստաթղթեր պետք է ստորագրվեին, մենք կանխարգելեցինք, իսկ հիմա փողոցային գործընթացներն ավարտվել են և մեր համակիրները մեզ մանդատ են տվել, որ մենք մեր գործունեությունը շարունակենք ԱԺ-ում»,-ասաց պատգամավորը և շեշտեց, որ ընդդիմությունն ԱԺ-ում աշխատելու է իր օրակարգով, որը վերաբերում է Արցախին, անվտնգությանը, պաշտպանությանը, սոցիալական խնդիրներին, տնտեսության վիճակին, պետական կառավարմանը, ՀՀ իշխանությունների հավասարակշռության խախտմանը:

Հայտարարելով որ, ընդդիմության օրակարգում մնում է գործող իշխանություններին հեռացնելը՝ Սեյրան Օհանյանը հայտնեց. «Մեր պետությունը պետք է ձերբազատվի պարտվողական իշխանություններից: Պարտված իշխանությունն անընդհատ գտնվում է պարտադրանքի, ճնշման ներքո և մենք ամբողջությամբ մեր գործիքակազմերը, քաղաքական ուժերի հնարավորություններն օգտագործեցինք իշխանություններին հեռացնելու համար»:

Նրա խոսքով՝ ընդդիմությունն ունեցել է նաև թերություններ, ավելի լայն համախմբումը հնարավոր չի եղել ապահովել, քանի որ մարդկանց մի մասը խնդիրներ ունի, ընդդիմադիրների մի մասը գտնվում է բանտերում, իսկ համակիրներից դուրս մարդկանց մի մասը մոլորված վիճակում է։

«Դրա համար չկարողացանք այն ուժը գեներացնել, որն անհրաժեշտ է այս իշխանությանը հեռացնելու համար և հիմա մենք կարծում ենք, որ ԱԺ-ում աշխատելու ժամանակ նաև մեր գաղափարակիցները պետք է լինեն մեր թիկունքին»,-նկատեց «Հայաստան» խմբակցության ղեկավար: