Ձեր վստահելի աղբյուրը

«Հայաստանը Վաշինգտոնում ադրբեջանական կողմին է փոխանցել խաղաղության պայմանագրին վերաբերող մեր մեկնաբանությունները, առաջարկները, ըստ էության, խաղաղության պայմանագրին վերաբերող տեքստը և սպասում ենք Ադրբեջանի արձագանքներին»,- Ազգային ժողովում կառավարության հետ հարցուպատասպանի ժամանակ ասաց Նիկոլ Փաշինյանը։

Նրա խոսքով, արձագանքների առումով, այնուամենայնիվ, տեսնում են լարվածության որոշակի միտումներ, և այդ լարվածությունը կապված է նաև կոնկրետ իրադարձությունների և կոնկրետ իրավիճակների հետ։

«Դուք գիտեք, որ Հայաստանի դիրքորոշումը հստակ է՝ Ադրբեջանի զորքերը պետք է դուրս գան Հայաստանի օկուպացված տարածքներից 2021 թվականի մայիսի 11-ից առաջ գոյություն ունեցած դիրքերը։ Ըստ էության, միջազգային հանրությունն աջակցում է մեր այս դիրքորոշումը, հույս ունենք, որ ՀԱՊԿ –ը նույնպես մեր այս դիրքորոշումը կպաշտպանի։

Իհարկե, տարօրինակ է իրավիճակը. թվում էր, թե հակառակը պետք է լիներ, ՀԱՊԿ-ը պետք է հստակ պաշտպաներ, և մենք  մյուս գործընկերի հետ  պետք է աշխատեինք դիրքորոշում կառուցելու համար, բայց հիմա  մենք ուղիղ հակառակն ունենք։ Հույս ունեմ, որ  մենք նոյեմբերի 23-ին Երևանում տեղի ունենալիք ՀԱՊԿ գագաթաժողովի ընթացքում այս կոնսենսուսը  կարձանագրենք։ Սա սկզբունքային որոշում է և դիրքորոշում է Հայաստանի համար։

Մենք չենք ուզում ՀԱՊԿ-Ադրբեջան պատերազմ հրահրել։ Մեզ համար չափազանց կարևոր է արձանագրել ՀԱՊԿ ընկալումն այս իրավիճակի հետ կապված։ Կարծում եմ, որ Հայաստանի քաղաքացիների վերաբերմունքը ՀԱՊԿ նկատմամբ և մեր հարաբերությունները ապագայի նկատմամբ ձևավորվելու է հենց այս հարցի հետ կապված»,- ասաց Փաշինյանը։

Նա ներկայացրեց նաև Ադրբեջանի դիրքորոշումը. «Ադրբեջանի դիրքորոշումն այն է, որ 2021 թվականի մայիսից առաջ էլ կային տարածքներ, որոնք, օրինակ, Հայաստանը օկուպացրել է։ Իրենք կարծում են, որ Հայաստանն էլ  իր հերթին պետք է դուրս գա այդ տարածքներից։ Մենք ասում ենք՝ շատ լավ, եկեք հասկանանք, եթե ինչ տարածքներից Հայաստանը պետք է դուրս գա,  ինչ սահմանով պետք է դուրս գա, այսինքն որտեղից որտեղ պետք է գնա։ Եթե մենք հասկանանք, ճշգրտենք այդ  սահմանը, դա կարող է Հայաստանի համար լինել շատ ընդունելի խոսակցություն։

Ասում ենք՝  ցույց տվեք մեզ գիծը, քարտեզը։ Դա կարող է լինել հետաքրքիր, և մենք չենք մերժում դա, որովհետև հենց այդ նույն տարածքներում  հայկական 4 գյուղերի տարածքների մեծամասնությունը օկուպացված է։ Օրինակ, Տավուշի մարզի Բերքաբեր գյուղի վարելահողերի մոտ 70 տոկոսն օկուպացված է, Պառավաքար  գյուղի վարելահողերի մոտ 70 տոկոսն օկուպացված է,  օկուպացված է Այգեհովիտ, Վազաշեն գյուղերի վարելահողերը 1992-94 թվականներին։

Ասում ենք՝ ցույց տվեք քարտեզը, սահմանի գիծը, ցույց տվեք, թե այդ սահմանի  ձեր ցույց տված գիծն ինչ իրավական հիմնավորում ունի։ Այդ դեպքում նաև մենք պատրաստ ենք իրադարությունը զարգացնել մինչև ամբողջ սահմանի երկայնքով ոչ ադրբեջանական,  ոչ հայաստանյան օկուպացված տարածքներ չլինեն։

Մենք պատրաստ ենք գնալ այդ լուծումներին, և ես այդ պատասխանատվությունը պատրաստ եմ վերցնել ինձ վրա, ես ուզում եմ և հայ հանրությունը, և միջազգային հանրությունն սա արձանագրի։

Խոսքը 29 հազար 800 քառակուսի կմ  ՀՀ տարածքային ամբողջականությունը վերականգնելու և ոչ թե զիջելու մասին է»։

Փաշինյանն ասաց, որ խաղաղության պայմանագրի վերաբերյալ կա երկու մոտեցում՝ դետալացված և շրջանակային համաձայնագրի մոդել, երբ որ շրջանակն է գծվում առանց  շատ մեծ  կոնկրետությունների։

«Փորձը ցույց է տալիս, որ եթե մենք շատ դետալացված հարցեր փորձենք լուծել, կարող է դժվարություններ ունենալ։ Սա է պատճառը, որ Հայաստանն առաջարկել է  ստորագրել խաղաղության շրջանակային համաձայնագիր»,- նշեց նա։