Ձեր վստահելի աղբյուրը

«Խորհրդարանկան ընդդիմությունը որևէ կերպ չի մասնակցել բյուջետային քննարկումներին, ես ոչ թե մտածում եմ, թե ինչու նրանք չեն մասնակցել, այլ ՀՀ քաղաքացիներ կան, որոնք իրենց ընտրել են և այդ քաղաքացիների ձայնը 2023 թվականի բյուջեի համատեքստում որևէ կերպ լսելի չի եղել»,-խորհրդարանում 2023թ ՀՀ բյուջեի քննարկման ժամանակ հայտնեց Ֆինանսավարկային և բյուջետային հարցերի մշտական հանձնաժողովի նախագահ Գևորգ Պապոյանը:

Նա ենթադրեց, որ ընդդիմությանն ընտրած քաղաքացիներն ունեցել են խնդիրներ, հարցեր, որոնք պետք է բարձրացվեին ընդդիմադիր պատգամավորների կողմից:

«Ցավոք սրտի դրանք չեն բարձրացվել, բայց մենք փորձել ենք այդ հարցերին ուշադրություն դարձնել»,-հայտարարեց ՔՊ-ական պատգամավորը:

Նրա խոսքով՝ 2023 թվականի բյուջեին կարելի է տալ նախկին տարիներին տված բոլոր բյուջեների քաղաքական գնահատականների հանրագումարը:

Անցնելով թվային ցուցանիշներին՝ Գևորգ Պապոյանն հայտնեց, որ 2023 թվականի պետական բյոջեն 2.6 տրիլիոն դրամ ծախսային մաս ունի, որը 6.5 մլրդ դոլար է կազմում և 80 %-ով ավել է 2018 թվականի պետական բյուջեից:

Ֆինանսավարկային և բյուջետային հարցերի մշտական հանձնաժողովի նախագահը ոգևորված ներկայացրեց բյուջեից դրական ցուցանիշները՝ մոռանալով անդրադառնալ հիմնական սոցիալական ցուցանիշին՝ հանրապետությունում աղքատության տոկոսին, որը 2018 -ի համեմատ, ըստ ՀԲ-ի գնահատականի, գրեթե կրկնապատկվել է: