Ձեր վստահելի աղբյուրը

Օրգանական և դեղագործական քիմիայի գիտատեխնոլոգիական կենտրոնի աշխատակիցներն այսօր առավոտյան Երևանի քաղաքապետարանի դիմաց բողոքի ակցիա իրականացրեցին։

Նրանք պահանջում են, որ քաղաքային իշխանության ներկայացուցիչները պատասխանեն  Ա Լ Մնջոյանի անվան Նուրբ օրգանական քիմիայի ինստիտուտի տարածքի օտարման և շինթույլտվության վերաբերյալ հարցերին։

Բողոքի ակցիայի մասնակիցներն իրենց ձեռքում ունեն «Գիտությունը ուժ է», «Կա գիտություն, կա ապագա», «Գիտությունը պետության հիմքն է», «Հզոր գիտություն, հզոր Հայաստան» ու այլ կարգախոսներով պաստառներ։

Քաղաքապետարանի դիմաց տևական ժամանակ կանգնելուց հետո կենտրոնի տնօրենին ու փոխտնօրենին հրավիրեցին ներս։ Մինչ նրանք դուրս կգային, կենտրոնի աշխատակիցները քաղաքապետանից երթով շարժվեցին դեպի Տարածքային կառավարման և ենթակառուցվածքների նախարարության շենք։

Հիշեցնենք, որ Ազատության պողոտայի սկզբնամասում գտնվող ՊՈԱԿ-ի նախկին տարածքում կառուցվելիք բարձրահարկ համալիրը, ըստ աշխատակիցնրերի,  վտանգի տակ է դնելու կենտրոնի գոյությունը:

Նրանք անթույլատրելի են համարում քիմիական գիտատեխնոլոգիական գործունեությամբ զբաղվող կենտրոնի օտարված տարածքում՝ ջրավազանի տեղը բարձրահարկ բնակելի համալիրի կառուցումը, նաև պնդում են, որ գիտատեխնոլոգիական կենտրոնը և բնակելի շենքը պարզապես անհամատեղելի են։