ՊՈԱԿ-ների միաձուլումն անորոշության մեջ է գցել «Բարեկամություն» պետական համույթի արտիստներին
Կառավարության որոշմամբ «Հայաստանի պարի պետական անսամբլ», «Հայաստանի պարարվեստի «Բարեկամություն» պետական համույթ» և «Թ. Ալթունյանի անվան երգի-պարի պետական համույթ» ՊՈԱԿ-ները միաձուլման ձևով վերակազմակերպվում են՝ ստեղծելով «Ժողովրդական երաժշտության և պարի ազգային կենտրոն» պետական ոչ առևտրային կազմակերպություն: Ըստ որոշման, կազմակերպության գործունեության հիմնական առարկան ժողովրդական երաժշտության և պարարվեստի ոլորտներում միասնական մշակութային գործունեության իրականացումն է.
«Միաձուլումը կնպաստի հայկական ժողովրդական ժանրում միասնական քաղաքականության արդյունավետ կիրարկմանը: Կազմակերպություններում առկա կլինի ադմինիստրատիվ և տեխնիկական սպասարկում իրականացնող աշխատակազմ, որը կապահովի ՊՈԱԿ-ի ենթակայությամբ գործող 6 ստեղծագործական կազմակերպությունների համերգային գործունեությունը, կկարգավորի դրանց տոմսային տնտեսությունը, կզբաղվի կազմակերպությունների գովազդատեղեկատվական գործունեությամբ:
Նորաստեղծ ՊՈԱԿ-ի կազմ կընդգրկվեն նաև ժողովրդական ժանրում մշակութային գործունեություն ծավալող ևս 3 ստեղծագործական խումբ, որոնք այժմ գործում են «Հայաստանի պետական ֆիլհարմոնիա» պետական ոչ առևտրային կազմակերպության ներքո՝ «Հայաստանի ազգային նվագարանների նվագախումբ»-ը, «Հայաստանի գուսանական և ժողովրդական երգի պետական համույթ»-ը և «Մարո Մուրադյանի անվան «Ակունք» ազգագրական համույթ»-ը»:
Որոշման համաձայն, մինչև տարեվերջ պետք է ավարտված լինի միաձուլվող կազմակերպությունների գույքագրման աշխատանքների իրականացումը, գույքի հանձնման-ընդունման աշխատանքների կատարումը, ինչպես նաև «Ժողովրդական երաժշտության և պարի ազգային կենտրոն» ՊՈԱԿ-ի կանոնադրությունը։
«Հայաստանի պարարվեստի «Բարեկամություն» պետական համույթ»-ի տնօրեն Արթուր Դանիելյանը Panorama.am-ի հետ զրույցում ասաց, որ չնայած հիմա ընթանում է հանձնման-ընդունման, գույքագրման գործընթացը, սակայն կան չպարզաբանված հարցեր, մարդիկ անորոշության մեջ են։
««Բարեկամություն» համույթի պարացանկի ընդամենը 20 տոկոսն է կազմում ազգային պար։ Ինչո՞ւ է համույթը կոչվում «Բարեկամություն»։ Որ այլ ազգերի հետ բարեկամական հարաբերություններ, մշակութային կապեր ստեղծի։ «Բարեկամությունը» հիմնականում պարում է այլ ազգերի, ժողովուրդների պարեր, միանշանակ մեր ազգայինն էլ հետ։ Բայց իրենք ստեղծում են «Ժողովրդական երաժշտության և պարի ազգային կենտրոն»»,- նշեց նա։
Ա.Դանիելյանն ընդգծեց, որ իրենց որևէ մեկը որևէ պարզաբանում չի տվել՝ ինչ է լինելու հետագայում. «Ասում են շենք են տալու երեք համույթների համար, հետագայում ևս երեք համույթ պետք է միանան այդ կենտրոնին։ Չեն ասում՝ ում կարգավիճակն ինչ է լինելու։
Հարցն այստեղ տնօրենի պաշտոնի աթոռը չէ, հարցը նրանում է, որ այս պահին կոլեկտիվի անդամներն ինձ են հարցեր ուղղում, որոնց պատասխանը ես չունեմ։ Ոչ մեկ չգիտի ՊՈԱԿ-ի կառուցվածքը, հաստիքացուցակը, ով է մնալու աշխատելու, ով է կրճատվելու։ Բոլորին ծանուցում կա, որ այս փոփոխությունից հետո տեղափոխվելու են մյուս կենտրոն, որից հետո հնարավոր է աշխատատեղերի կրճատում, բայց կոնկրետ ինչ հաստիքի կրճատման մասին է խոսքը, չգիտենք։
Մեկ ասում են վարչական կազմը ուրիշ տեղ է աշխատելու, արտիստներն ուրիշ տեղ։ Դրա իմաստը որն է, չեմ հասկանում։ Թող գան, ժողով անեն երեք համույթների արտիստների, վարչական մասի աշխատակիցների հետ, պատասխանեն հարցերին, որպեսզի այս մարդիկ անորոշության մեջ չլինեն։
Պետք է պարզաբանվեն այդ հարցերը։ Թող պատասխանեն՝ ինչի համար է դա արվում, ինչ է տալու մեզ, ինչ է տալու հայ ազգին, մեր մշակույթին»։
«Բարեկամություն» համույթի տնօրենն ասաց, որ նախքան որոշման ընդունումը, ինքը որևէ քննարկման չի մասնակցել, իր տեղեկություններով մյուս համույթների ղեկավարների հետ էլ քննարկում չի եղել։
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
