Ձեր վստահելի աղբյուրը

«Տնտեսական ներուժի ավելացմանն ուղղված կառավարության հնգամյա ծրագրի նպատակային  թիրախների ներքո 2023 թվականի համար ևս նախանշվել է տնտեսական աճի 7 տոկոս  մակարդակ»,- Ազգային ժողովում 2023 թ. ՀՀ պետական բյուջեի օրենքի նախագծի վերաբերյալ ԿԲ եզրակացությունը ներկայացնելիս՝ ասաց հարակից զեկուցող Կենտրոնական բանկի նախագահ Մարտին Գալստյանը։

Նա նշեց, որ տնտեսական  նախանշված աճի  պայմաններում  2023 թվականի պետական բյուջեի ծրագիրն ընդհանուր առմամբ  նպատակադրում է  հարկեր-ՀՆԱ-ում ավելի դանդաղ աճ, սակայն  կապիտալ ծախսերի և պարտքի կրճատման  տեմպերի արագացում, որի արդյունքում  համախառն  պահանջարկի վրա բյուջեի վարքագիծը 2023 թվականին կունենա չեզոք ազդեցություն։

ԿԲ նախագահի ներկայացմամբ, 2023 թվականի  համար նախանշված  բարձր տնտեսական աճի հիմքում ընկած է  արտադրողականության և մրցունակության աճի ապահովման համար անհրաժեշտ առանցքային ներդրումների, այդ թվում պետական ներդրումների  մասնաբաժնի էական մեծացումը և արտահանման աճի համար կայուն հիմքերի ձևավորումը, ուստի  տնտեսական աճի ապահովումը զգալիորեն կախված կլինի  կառավարության կողմից ենթակառուցվածքներում խոշոր պետական ներդրումների սահմանված  ժամկետներում և ծրագրավորված համամասնություններով  իրականացումից, ինչպես նաև ծրագրով նախատեսված ներդրումների խրախուսման և արտահանման խթանման ուղղությամբ միջոցառումների ամբողջական կատարումից։

«2023 թվականին ևս հարկաբյուջետային քաղաքականությունը կշարունակի սահուն կոնսոլիդացիայի իրականացումը՝ նպաստելով պարտքի բեռի նվազեցմանը, միաժամանակ այն համադրելով տնտեսական աճի  խթանմանն ուղղված պետական ներդրումների էական մեծացման քաղաքականության հետ»,- ասաց Մ. Գալստյանը։

Նա նշեց, որ նախանշված տնտեսական աճի,  ինչպես նաև հարկային վարչարարարության բարելավման արդյունքում 2023 թ. նպատակադրվել է հարկեր-ՀՆԱ ցուցանիշի 0,5 տոկոսային կետով աճ, որի արդյունքում հարկեր-ՀՆԱ  ցուցանիշը կկազմի 23,7 տոկոս։

Մ.Գալստյանի խոսքով, 2023  թվականի թե տնտեսական աճին նպաստելու, թե ծախսերի կառուցվածքի բարելավմանն  ուղղված հարկաբյուջետային  քաղաքականության նպատակադրումների ներքո  նախատեսվում է էականորեն  մեծացնել կապիտալ ծախսերի  կշիռը ՀՆԱ-ում՝ հասցնելով 5,9 տոկոսի և նվազեցնել ընթացիկ ծախսերը՝ հասնելով 21,9։

«Այստեղ հարկ ենք համարում ընդգծել այն հանգամանքը, որ  ամբողջական պահանջարկի  մեծ աճի պայմաններում պետական  ծախսերի ընդլայնող քաղաքականությունը կարող է որոշակի ռիսկեր  առաջացնել մակրոտնտեսական կայունության  ապահովման տեսանկյունից, ուստի անհրաժեշտ ուշադրության է արժանի ՀՀ  օրենսդրությամբ սահմանված հարկաբյուջետային ծախսային կանոնի պահպանումը և դրան համահունչ  ընթացիկ ծախսերի հնարավորին սահմանափակումը և կապիտալ ծախսերի  որդեգրված քաղաքականության  արդյունավետ իրականացումը»,- ասաց նա։

ԿԲ նախագահն ընդգծեց, որ 2023 թվականին կապիտալ ծախսերի ավելացման հաշվին պետական բյուջեի պակասուրդը կավելանա՝ կազմելով ՀՆԱ-ի 3,1 տոկոսը, իսկ հարկաբյուջետային քաղաքականությունը կլինի չեզոք՝ նպաստելով նաև պարտքի բեռի 1 տոկոսային կետով նվազման, և այն կկազմի շուրջ 49,7 տոկոս։

Նրա խոսքով, 2023 թվականի պետական բյուջեի ծրագրի լիարժեք իրականացումը ևս զգալիորեն կախված կլինի 2022 թվականի բարձր տնտեսական ակտիվությունը համարժեք մակրոտնտեսական քաղաքականության կայուն, երկարաժամկետ աճի վերածելու կարողությունից։

«Այս պարագայում տեղին է  կրկնել և շեշտադրել  միջնաժամկետ հատվածում պարտքի ավելի մեծ չափով կրճատման և կայունության նշանակությունը։ Այս համատեքստում կցանկանայի  շեշտադրել սպասվածից մեծ չափով պարտքի բեռի հնարավոր նվազման դեպքում սոցիալական ծախսերի կատարման  նոր պարտավորությունների ստանձման հավանական  ռիսկերը և դրանց բացառման անհրաժեշտությունը։

Ստեղծված իրավիճակում կարևորվում է  կոորդինացված  դրամավարակային և հարկաբյուջետային քաղաքականությունների իրականացումը, ուստի առաջանցիկ պահանջարկի կարգավորման և մակրոտնտեսական կայունության ապահովման համար 2023 թվականին անհրաժեշտ կլինի  իրականացնել զգալի զսպող հարկաբյուջետային քաղաքականություն»,- ասաց ԿԲ նախագահ Մարտին Գալստյանը։