Ձեր վստահելի աղբյուրը

«Աշխատանքի և սոցիալական հարցերի նախարարը  ֆինանսների նախարարի հետ միասին պետական բյուջեի նախագիծ է մշակել և բերել ԱԺ, որով առաջարկվում է՝ նախարարների աշխատավարձը հաջորդ տարի բարձրացնել 142 հազար դրամով, իրեց ղեկավարի՝ վարչապետի աշխատավարձը 200 հազար դրամով, իսկ աշխատող  աղքատի աշխատավարձը բարձրացնել 7000 դրամով»,- խորհրդարանական ճեպազրույցների ժամանակ ասաց «Հայաստան» խմբակցության պատգամավոր Թադևոս Ավետիսյանը՝ խոսելով 2023 թ. պետական բյուջեի մասին, որի նախագիծը երեկ քննարկվեց ԱԺ նիստի ընթացքում։

Նա հիշեցրեց, որ այս իշխանությունները խոստացել են 2026 թվականին նվազագույն աշխատավարձը դարձնել 85 հազար դրամ, իսկ հաջորդ տարվա համար 75 հազար դրամ են դարձրել։

«Շատ լավ, եթե այս գնաճի տեմպերը շարունակվեն, մեկ անձի մեկ ամսվա նվազագույն սպառողական  զամբյուղը 85 հազար դրամ կդառնա հաջորդ տարվա մինչև կեսերը կամ ավարտը։ Այսինքն, մենք խոսում ենք բացարձակ թվերի մասին,  բայց դրանք ոչինչ չեն ասում։ Ի վերջո հատկապես աշխատող աղքատների,  անապահով  խավի գնողունակությունը հարաբերականորեն ավելի արագ է  նվազում, քանի որ իրենց եկամուտներն առանց այն էլ չեն հերիքում նվազագույն իրենց կարիքները հոգալու համար»,- ասաց ընդդիմադիր գործիչը։

Թ. Ավետիսյանի խոսքով, իշխանությունները խոսում են տնտեսական ակտիվությունից, հույսը դրել են, որ ռուս-ուկրաինական պատերազմի հետևանքներով ձևավորված տնտեսական միջավայրի օգուտները դեռ կշարունակվեն հաջորդ տարի։

«Այսինքն, ժամանակավոր մի գործոնով՝ արտաքին գործոն, որի հետ իրենք աղերս չունեն, մեր տնտեսությունն աճում է,  14 տոկոս տնտեսական ակտիվություն կա, դրա հենքի վրա իրենք պլանավորում են հաջորդ տարվա բյուջեն՝ շատ լավ իմանալով, որ մեծ է ռիսկը, որ նման  տնտեսական ակտիվություն չլինի։ Դրա համար  էլ այդպես վախվորած, շատ քիչ չափերով ոչ համարժեք գնաճին որոշակի աճեր են նախատեսում հաջորդ տարվա համար»,- ասաց «Հայաստան»  խմբակցության պատգամավորը։

Նա ընդգծեց նաև, որ Հայաստանում ժողովրդագրական խնդիրները գնալով խորանում են։ Թ. Ավետիսյնանն ասաց, որ ծնելիության մակարդակը, արտագաղթի տեմպերը որևէ կերպ չեն բարելավվել այս ընթացքում ու դրա փոխարեն որոշակի ծրագրեր են բերել, որոնք չունեն սոցիալական ազդեցության հստակ գնահատումներ։

Նրա խոսքով, Հայաստանում գյուղատնտեսության իրական ծավալները հետևողականորեն նվազում են ու սա է նաև պատճառներից մեկը, որ առաջին անհրաժեշտության ապրանքների գնաճն էապես ավելի բարձր է, քան՝ միջին գնաճը. սննդամթերքը գրեթե 1,5 անգամ ավելի շատ է թանկանում, քան՝ միջին գնաճը, որ կա Հայաստանում։

«Մի կարևոր հանգամանք ևս. մենք գնում ենք աշխարհին հակառակ ճանապարհով, քանի որ մեր երկրում 2018 թվականից հետո, այս պահի դրությամբ, պարենային ապրանքների ապահովվածության գործակիցը 65 տոկոսից նվազել է մինչև 47 տոկոս, սա լուրջ խնդիր է»,- ընդգծեց պատգամավորը։

Նա նաև ասաց, որ ահագնացող գնաճի բոլոր գործոնները հիմա կան, կանխատեսվում է, որ լինելու է նաև հաջորդ տարի։

«Այնպես որ, այն բյուջեն, որ բերել են այսօրվա իշխանությունները, հետևյալի մասին է, որ ամեն հաջորդ օր, նաև հաջորդ տարի, մեր քաղաքացիները,  խոսքը նախ և առաջ վերաբերում է  աշխատող աղքատներին, միայնակ  կենսաթոշակառուներին, ընդհանրապես աղքատ ընտանիքներին, ավելի վատ են ապրելու, որովհետև ամեն հաջորդ օր գները բարձրանում են, իրենց եկամուտներն էլ դրանց համապատասխան չեն բարձրանում»,- ասաց Թադևոս Ավետիսյանը։