Ձեր վստահելի աղբյուրը

Վլադիմիր Զելենսկին կարծում է, որ խոսելով Ուկրաինայի հետ բանակցությունների հնարավորության մասին՝ Ռուսաստանը ձգտում է ոչ թե խաղաղության, այլ միայն ցանկանում է «կարճաժամկետ անդորր» հաստատել ռազմական գործողություններում։ Այս մասին գրում է «Ռիա Նովոստի» գործակալությունը։

Մոսկվան բազմիցս նշել է, որ պատրաստ է բանակցությունների, սակայն ընդգծել է, որ Կիևն օրենսդրական մակարդակով արգելք է դրել դրանց վրա։ Ավելի վաղ Զելենսկին հայտնել էր՝ ազդանշաններ է ստացել արևմտյան գործընկերներից, որ Ռուսաստանը ցանկանում է ուղիղ բանակցություններ վարել և առաջարկել է հրապարակային ձևաչափ։

Իր հերթին ՌԴ նախագահի մամուլի քարտուղար Դմիտրի Պեսկովը նշել է, որ Վաշինգտոնը, ցանկության դեպքում, կարող է շատ բան անել, այդ թվում՝ ազդել Կիևի վրա։

«Ռուսաստանն այժմ կարճաժամկետ դադար  է փնտրում՝ ուժերը վերականգնելու համար։ Ինչ-որ մեկը դա կարող է անվանել պատերազմի ավարտ: Բայց նման դադարը միայն կվատթարացնի իրավիճակը»,- հայտարարել է Զելենսկին։

Նրա խոսքով՝ տարածքային զիջումները, ինչպես նաև Ուկրաինայի ինքնիշխանությամբ զիջումները խաղաղություն չեն երաշխավորում, իսկ «անբարոյական» փոխզիջումները կհանգեցնեն նոր զոհերի։

Զելենսկին նաև նշել է իր «խաղաղության բանաձևը»՝ բաղկացած տասը կետից, որոնցից առաջին երեքն են՝ ռադիացիոն և միջուկային անվտանգություն, պարենային և էներգետիկ անվտանգություն։