Ձեր վստահելի աղբյուրը

Գնահատման և թեստավորման կենտրոնի տվյալներով՝ պետական և ոչ պետական բուհերի  շուրջ 163 մասնագիտություններում որևէ դիմորդ չի եղել: Պետական բուհերի շրջանում էլ քիչ պահանջված է 28 մասնագիտություն։ ԳԹԿ-ից Panorama.am-ին փոխանցեցին այսպես ասած՝ թոփ հինգ պահանջված  մասնագիտությունների և այն 28 մասնագիտությունների ցանկերը, որտեղ ընդհանրապես դիմորդ չի եղել։

Այսուհանդերձ, վերջին տարիներին  պահանջված և ոչ այդքանմասնագիտությունների մասով  ընդհանուր առմամբ պատկերը գրեթե չի փոխվել։ Ակնհայտ է, որ կատարվող քայլերը բավարար չեն՝ հատկապես երկրի համար կարևոր նշանակություն ունեցող մասնագիտությունների թափուր տեղերը համալրելու ուղղությամբ։  Իսկ դրանց թիվը, ինչպես երևում է ցանկից, քիչ չեն։
Օրինակ՝ Շիրակի մարզի Մ. Նալբանդյանի անվան պետական համալսարանի աշխարհագրության ֆակուլտետն այս տարի դիմորդ չի ունեցել։  ԵՊՀ-ի նույն ֆակուլտետում եղել են դիմորդներ, սակայն արդյունքներն այդուհանդերձ մտահոգիչ են։

«Աշխարհագրության ֆակուլտետի երկրորդ կուրսում ունենք 42 հոգի, երրորդում ՝ մի փոքր շատ, չորրորդում՝ գրեթե նույնքան։ Առաջին կուրսի դեպքում կարող եմ ասել, որ հանկարծակիի եկանք՝ դիմորդների թիվը քիչ էր, բացի այդ,  կտրվեցին մաթեմատիկայից։ Հիմա մենք առաջին կուրսում ունենք 7 հոգի, հունվարին բանակից կգան ևս երեքը, կդառնա տասը ուսանող։ Հաջորդ տարի , կարծում եմ, կունենանք 20-30 առաջի կուրսեցի»,- Panorama.am-ի հետ զրույցում ասաց ԵՊՀ Աշխարհագրության և երկրաբանության ֆակուլտետի սոցիալ-տնտեսական աշխարհագրության ամբիոն վարիչ, ա.գ.թ. , դոցենտ Վահագն Գրիգորյանը։

Ընդհանուր առմամբ՝ գնահատելով իրավիճակը Աշխարհագրության և երկրաբանության ֆակուլտետում  «կանգուն վիճակ է»։  Նրա համոզմամբ՝  2,5-3 մլն բնակչություն ունեցող երկրի համար այսքան շատ բուհերի առկայությունն անիմաստ է։ 

«Նախ պետք է քչացնել բուհերի քանակը, հետո՝ վերացնել  ընդունելության քննությունները։ Դասական  մասնագիտությունների գծով (մաթեմատիկա, ֆիզիկա, մեխանիկա, քիմիա, երկրաբանություն, կենսաբանություն, աշխարհագրություն) կարելի է ընդունելության քննությունները վերացնել։ Շրջանավարտներն ավարտական վկայականի հիման վրա դիմում են իրենց նախընտրած մասնագիտության համար։ Իսկ «մոդեռն»  կամ պահանջված մասնագիտությունների գծով(իրավագիտություն, կիրառական մաթեմատիկա, սոցիալական աշխատանք,լեզուներ և այլն) թող լինեն մեկ քննություն։ Կամ երրորդ ՝ վատագույն տարբերակը․ Քանի որ ուսումնական տարվա կեսից հանկարծակիի եկանք, երբ մեկ ընդունելության քննությունը դարձավ երկու, կարող են ընդունելության քննությունը դարձնել ՝մեկ։ Այսինքն, ըստ իս՝ ընդունելի տարբերակներն այս երեքն են»,- նշեց Գրիգորյանը։

Դոցենտ Գրիգորյանը որոշակի առումով  իրավիճակում փոփոխություն մտցնելու և դիմորդների շրջանում հետաքրքրություն առաջացնելու նպատակով դեռևս չորս տարի առաջ սկսեց իրականացնել բուհական ծրագրով անվճար պարապմունքներ աշխարհագրություն առարկայից։ Անվճար պարապմունքներն  այն դիմորդների համար են, որոնք ցանկանում են ընդունվել  աշխարհագրության և երկրաբանության ֆակուլտետ։

«Պատկերացրեք առաջին տարին, երբ հայտարարեցի անվճար պարապմունքներ անցկացնելու մասին,  մեծ արձագանք եղավ, դիմորդների թիվը շատ էր՝ 18 հոգի,որից միայն 2-ը չեն ընդունվել։ Բայց հաջորդող տարիներին՝ երկրորդ, երրորդ և այս տարի արդեն՝ կտրուկ նվազեց։ Այս պահի դրությամբ  ունեմ ընդամենը չորս աշակերտ։ Նախորդ տարի ևս նույնքան էր»,- ասաց նա։

Պարապմունքների նկատմամբ հետաքրքրության նվազման պատճառներն, ըստ Աշխարհագրության և երկրաբանության ֆակուլտետի սոցիալ-տնտեսական աշխարհագրության ամբիոն վարիչի, տարբեր են․ «Գուցե արտագաղթով, պատերազմական վիճակով, հստակ նշել չեմ կարող, բայց աշակերտների թիվը կտրուկ նվազեց։ Գուցե ազգային խառնվածք  է՝ անվճար է, դրա համար էլ մատերի արանքով են նայում, երբ վճարում են, ավելի լավ է լինում»։

Մասնագետը հույս հայտնեց, որ դեռ հնարավոր է լինեն աշակերտներ, որոնց կհետաքրքրեն անվճար պարապմունքները։