Ձեր վստահելի աղբյուրը

«Բազմիցս ասել ենք, որ խոսքով չէ խաղաղությունը լինում։ Խաղաղությունը մարդիկ պարտադրում են»,-News.am-ին տված հարցազրույցում ասել է Միացյալ Հայաստան» կուսակցության նախագահ Երվանդ Թարվերդյանը՝ անդրաառնալով Նիկոլ Փաշինյանի հռետորաբանության փոփոխության վերաբերհակ հարցին։

Կուսակցության նախագահն ասաց՝ իր ղեկավարած քաղաքական ուժը դեմ է եղել խաղաղության պայմանագրին։

«Քանի որ Ադրբեջանը առաջնորդվում և հանդես է գալիս ագրեսորի դիրքից, երբևիցե չի կարելի այս պայմաններում նրա հետ որևէ փաստաթուղթ ստորագրել, այն էլ երկարաժամկետ խաղաղության կամ հաշտության պայմանագիր: Խաղաղությունը թղթով չի սահմանվում, այն պարտադրվում է: Մյուս կողմից միջազգային հարաբերություններում հավերժ խաղաղություն չի կարող լինել, այդպիսին չի գործում: Մենք փորձում ենք հաշտության համաձայնագիր ստորագրել մի պետության հետ, որը չի վերադարձնում մեր գերիներին: Շանտաժի դիրքերից է Ալիևը խոսում և նրա ագրեսորի հայտարարությունները պետք է անհանգստացնեն մեր իշխանություններին և նրանք չմուրան այդ խաղաղությունը, չշտապեին դա մինչև Նոր տարի ստորագրել, ի՞նչ է ձմեռ պապիկի նվեր են պատրաստում հայությանը»,-ասել է նա:

Անդրադառնալով հայ-ադրբեջանական հարաբերությունների կարգավորման ռուսական և արևմտյան տարբերակներին, Թարվերդյանն ասել է. «Մեր ապիկար իշխանությունները հերթական անգամ հակասում են իրենք իրենց՝ հայտնելով, որ չկա որևէ տարբերակ: Եթե չկա որևէ տարբերակ, ինչու էիք բանակցություններ իրականացնում Ռուսաստանի կամ ԵՄ ներկայացուցիչների հետ: Եթե պետության անունից բանակցություններ են վարում ու ոչ մի արդյունքի չեն հասնում, առնվազն վարչապետը պետք է հեռացնի թե ԱԳ նախարարին, թե ԱԳՆ ամբողջ անձնակազմին, եթե նրանք հայտարարում են, որ ոչ մի տարբերակ չկա սեղանին դրված:

Մեր իշխանությունները տարօրինակ վարքագիծ են դրսևորում. մի օր ողջունում են ամերիկյան  ներկայացուցիչների հայտարարությունները, մի օր ողջագուրվում են եվրոպական գործիչների հետ, մի օր Ռուսաստանին են ցանկանում հաճոյանալ՝ հայտարարելով, որ իրենք պրոռուսական են: Եղբայր, ի՞նչ պրոռուսական, դու պետք է պրոհայկական լինես: Միավեկտոր քաղաքականությունը վտանգավոր է հայության համար»:

Ինչ վերաբերում է նրան, որ օրերս ԱՄՆ պետքարտուղար Բլինքենը ՀՀ վարչապետ Նիկոլ Փաշինյանին կոչ էր արել պահպանել բանակցությունների տեմպը, Երվանդ Թարվերդյանը նշել է.

«Երևի թե ՀՀ իշխանություններն իրենց հայտարարություններով հաստատել էին, որ մինչև տարվա վերջ լինելու է խաղաղության համաձայնագիր: Խաղաղության համաձայնագիրը Արևմուտքի համար Ռուսաստանի ազդեցության նվազեցումն է, նրանք հաջորդ քայլին պետք է պնդեին թեկուզ Ադրբեջանի միջոցով, որ ռուս խաղաղապահները դուրս գան Արցախից, նաև տարածաշրջանից: Նրանք կասեն՝ եթե ունեք խաղաղության համաձայնագիր, ինչի՞ է պետք ռուսական ռազմաբազան: Այստեղ է, որ Հայաստանի իշխանությունը պետք է գիտակցի մեր շահը: Մենք պետք է վարենք շատ գրագետ արտաքին դիվանագիտություն, պետք է գիտակցենք, որ այսօր այս տարածաշրջանում ճիշտ կարգավորումով հետաքրքրված են նաև Չինաստանն ու Հնդկաստանը: Հայաստանն ավելի շատ պետք է մտածի անվտանգության, այլ ոչ թե այդ դեկլարատիվ փաստաթղթի մասին»:

Թարվերդյանը համոզմունք է հայտնել, որ ավելի լավ կլիներ, որ Հայաստանն ավելի լուրջ քննարկումներ իրականացներ Չինաստանի և Հնդկաստանի հետ Հյուսիս-Հարավ ճանապարհի կառուցմանը նրանց  ներգրավելու առումով. «ՀՀ իշխանություններն այսօր պարտավոր են ստեղծել այդ կոմունիկացիաները: Մենք տեսնում ենք, որ Իրանի պատրաստակամությունը Հյուսիս-Հարավի կառուցման գործում: Նրանց՝ այս կոմունիկացիայից օգտվելու իրավունքը մեզ հնարավորություն է տալիս մեր դաշնակցային հարաբերություններն Իրանի հետ ավելի լավացնել»:

Հարցազրույցն ամբողջությամբ սկզբնաղբյուր կայքում։https://news.am/arm/news/731142.html