Ձեր վստահելի աղբյուրը

«Այսօր ներկայացվող նախագիծը հանրային շահի գերակայության մասին է, քանի որ մեր մշակույթում շատ տարածված է, որ ծնունդներին, կնունքներին, հարսանիքներին հրավառություններ են տեղի ունենում»,-Երևանի ավագանու նիստում հայտարարեց Երևանի քաղաքապետի տեղակալ Տիգրան  Ավինյանը:

Ըստ փոխքաղաքապետի՝ այդ միջոցառումների մասնակիցներին հրավառությունը կարող է հաճելի լինի, բայց այն նաև կարող է տհաճություն պատճառել հարակից տարածքների հազարավոր մարդկանց:

«Ներկայացվող նախագծով Երևանում տեխնիկական և հատուկ նշանակության հրավառության իրականացման թույլատրելի վայրերը, ինչպես նաև դրանց պայմանները և պահանջներն են սահմանվում»,-հայտնեց Ավինյանը և շարունակեց. «Ըստ էության, նախագծով արգելվում է մասնավոր անձանց կողմից Երևան քաղաքում հրավառությունների իրականացումը և սահմանվում է, որ դրա համար կա երկու վայր՝ Հանրապետության հրապարակը, Ազատության հրապարակը և դրանց կից տարածքները՝ միայն տոն օրերին և ՏԻՄ համաձայնությամբ»:

Նա տեղեկացրեց, որ բացառության կարգով Երևանի քաղաքապետին լիազորություն է տրվում հատուկ միջոցառումների համար նախագծում հիշատակված երկու հրապարակներից դուրս հրավառություն անցկացնելու թույլտվություն տալ, բայց այն էլ անսահմանափակ չէ և հրավառության վայրերը և պայմանները կանոնակրգվում են:

«Բայց մենք հանրության համար կարևոր իրադարձությունների ժամանակ կտեսնենք հրավառություններ և ստիպված չենք լինի բոլորի ծնունդներին, կնունքներին և հարսանիքներին մենք բոլորս անձամբ, մեր երեխաների հետ մասնակից լինել»,-ասաց Ավինյանը և տեղեկացրեց, որ ընդունվել է օրինագիծ, որով կարգելվի դրանց ներմուծումը:

Ավագանու անդամների խնդրանքով պարզաբանվեց, որ հրավառություն կազմակերպելու համար օրենքով սահմանված է 300 հազար դրամից մինչև 2 մլն դրամ տույժ: