Ձեր վստահելի աղբյուրը

Բարձրագույն դատական խորհրդում երեկ տեղի է ունեցել հակակոռուպցիոն քաղաքացիական գործեր քննող դատավորների ընտրության հարցազրույցի փուլը։

Խորհուրդից հայտնել են՝ կոռուպցիոն հանցագործությունների քննություն իրականացնող դատավորների կազմում ընդգրկվելու համար հարցազրույցի փուլին մասնակցող 2 թեկնածուից ընտրվել է  1-ը՝ դատավոր Մնացական Մարտիրոսյանը՝ 6 կողմ, 3 դեմ ձայնով:

Ֆեյսբուք սոցիալական ցանցում իրավաբաները, փաստաբաները, ակտիվիստները զարմանք, ափսոսանք, վրդովմունք են հայտնել կատարվածի վերաբերյալ։

Իրավաբան Արսեն Բաբայանը, օրինակ, գրում է. 

«Ինձ հետաքրքրում է, թե արդյոք ԲԴԽ նախագահ Կարեն Անդրեասյանը դեմ է քվեարկել Մնացական Մարտիրոսյանին կոռուպցիոն հանցագործություններ քննող դատավոր նշանակելու հարցին:
Հիշելով Կարեն Անդրեասյանի աննահանջ պայքարը դատական համակարգում կոռուպցիան վերացնելու ուղղությամբ՝ կասկած չունեմ, որ նա Մնացական Մարտիրոսյանի այդ պաշտոնում նշանակմանը ոչ միայն դեմ է եղել, այլ՝ դեռ հասնելու է նրան, որ նախկինի հետ ասոցացվող և նախկին իշխանության հանձնարարությունները կատարելու մեջ մեղադրվող դատավորները հեռացվեն դատական իշխանությունից:
Հակառակը պարզապես չեմ պատկերացնում: Փոքր երկրում ենք ապրում, մի օր Կարեն Անդրեասյանը ստիպված է լինելու աչքերիս նայել»։
 

Հայտնի փաստաբան Ռուբեն Մելիքյանը գրում է. 

«Տանը սուս ու փուս գործ էի անում, ոչ ոքի չէի խանգարում, ոչ ոքի չէի նեղացնում, երբ ընկերներիցս մեկը զանգեց։ Ասեց՝ իմացա՞ր վերջին նորությունը. Մնացական Մարտիրոսյանին նշանակել են Հակակոռուպցիոն դատարանի դատավոր…
Կարճ ասած՝ ու՞մ էի լավություն արել, որ վերջին պահին հրաժարվեցի ունեցած-չունեցածիս վրա գռազ գալուց, որ նման բան չի կարող լինել, որովհետև նման բան չի կարող լինել երբեք…
Մի րոպեում զրոյացնել «կոռուպցիայի դեմ պայքարի» քառամյա եվրոմիֆը - դա կարող էր անել միայն քպ-ն։ Ուրիշ ոչ ոք։
ՀԳ. Մտածում եմ՝ կարողա՞ ինչ-որ մեկը գռազ էր եկել, որ նման բան է անելու… Ո՞վ կարող է բացառել…»։

Բլոգեր Տիգրան Քոչարյանը գրում է. 

«Դատավոր Մնացական Մարտիրոսյանին նշանակել են հակակոռուպցիոն գործերով դատավոր։
Пчелы против меда.
ՔՊ против наркотиков.
Пашинян против Азербайджана»։

ԿՏԱԿ-ի ՏՀՏ Բովանդակության բաժնի մասնագետ արտակ Հարությունյանը գրում է. 

«Հավաստի աղբյուրը հավանաբար վաղը կտեղեկացնի, որ Մնացական Մարտիրոսյանին (նույն ինքը՝ Մացո) հակակոռուպցիոն դատարանի դատավոր են ընտրել, քանզի բացառիկ կերպար է, ով ուղնուծուծով տիրապետում է գործին»։

Ժուռնալիստների «Ասպարեզ» ակումբ ՀԿ նախագահ Լևոն Բարսեղյանը երեկվանից  գրառումներ է անում միայն այդ դատավորի ընտրության մասին։ Դրանցից մեկում նա մասնավորապես գրել է. 

«Շնորհավոր սիրելի ժողովուրդ, ձեր հեղափոխության շնորհիվ Մացո դատավորը մնաց Մացո դատավոր, որ պիտի քննի կոռուպցիոն գործեր: Բան չմնաց: Երեւի չպատկերացրիք: Ահա փորձեմ նկարագրել. Գեբելսին հիշում եք, հա՝ ինքը: Պատկերացրեք՝ նա ընտրվում է հրեա երեխաների մանկապարտեզի տնօրեն: Բեզլիմիտ:
Հատուկ շնորհակալություն իշխանությանը կատարյալ համարող, անսխալ համարող հպատակներին»։

Բարսեղյանը հույս է հայտնել, որ Վահագն Խաչատուրյանը չի ստորագրի Մնաացականյանին նշանակելու հրամանագիրը։

«Իրազեկ քաղաքացիների միավորում» ՀԿ նախագահ Դանիել Իոաննիսյանն էլ ֆեյսբուքյան իր էջում մանրամասներ է հրապարակել  այս դաավորի ընտրությունից.

«Ինչպես գիտեք, Հայաստանում ամենաշատ քաղբանտարյալներ դատած դատավոր Մնացական Մարտիրոսյանը (հայտնի է «Մացո» մականունով) քիչ առաջ ԲԴԽ-ի կողմից նշանակվել է Հակակոռուպցիոն դատարանի դատավոր:

«Իրազեկ քաղաքացիների միավորման» ներկայացուցիչ Վաղարշ Աղաբեկյանը, հանդիսանալով ԲԴԽ կողմից կազմակերպվող հակակռուպցիոն դատարանների դատավորների մրցույթի ազգային փորձագետ, բացասական եզրակացություն էր տվել Մնացական Մարտիրոսյանի թեկնածությանը:

Ավելին, Հակակոռուպցիոն դատավորի թեկնածուներից Մնացական Մարտիրոսյանը միակն էր, ում բարեվարքության մասին թե՜ մեր ներկայացուցիչը և թե՜ Կոռուպցիայի կանխարգելման հանձնաժողովը տվել էին բացասական եզրակացություն: Մնացական Մարտիրոսյանի թեկնածությունը բացասական էր գնահատվել նաև ԲԴԽ-ի կողմից ներգրավված միջազգային փորձագետ Վիտալի Կասկոի կողմից:

Մնացական Մարտիրոսյանը, որպես դատավոր, մասնագիտական գործունեության ընթացքում ունեցել է բազմաթիվ քաղաքական քրեական գործեր, որոնց մի մասով առկա է Մարդու իրավունքների եվրոպական դատարանի կողմից արձանագրված խախտումներ: Այդ թվում, օրինակ, Նիկոլ Փաշինյանին ապօրինի ազատազրկելը:

Այդ անձի կայացրած ապօրինի դատավճիռների արդոյւնքում Հայաստանի Հանրապետությանը նաև պատճառվել է գույքային վնաս, ինչպես նաև բարոյական վնաս է հասցրել ՀՀ դատական համակարգին և խաթարել հանրային վստահությունը այդ համակարգի նկատմամբ։
Եվ հիմա Մնացական մարտիրոսյանը պիտի կոռուպցիոն գործերով Հայաստանի հանրության անունից և հանուն Հայաստանի Հանրապետության արդարադատությու՞ն իրականացնի: Ո՞վ է վստահելու կոռուպցիայի դեմ այսօրինակ պայքարին:

ԲԴԽ-ի այս քայլը ունենալու է լուրջ հետևանքներ, որոնք այժմ քննարկում ենք գործընկեր-կազմակերպությունների հետ»։