Ձեր վստահելի աղբյուրը

Փաստաբան Լուսինե Վիրաբյանը գրում է․

«Ի պատասխան Բարձրագույն դատական խորհրդի կողմից 22.11.2022թ._ին տարածված հերքման, ցանկանում եմ հանրությանը տեղեկացնել հետևյալը.

1. Վճռաբեկ դատարանը ստացել է էլեկտրոնային կրիչը, որին անդրադարձել է նաև որոշմամբ, որի սքրինը ներկայացնում եմ ստորև։

2. Հիշատակվող ապացույցները ներկայացվել են.

ա)Վարչական դատարանի նախագահին,
բ) Վարչական դատարանի գրասենյակի պետին,
գ) Վարչական վերաքննիչ դատարանի նախագահին,
դ) Վարչական վերաքննիչ դատարանի աշխատակազմի ղեկավարին,
ե) Արդարադատության նախարարին,
զ) Գլխավոր դատախազին,
է) գործով հետաքննիչին,
ը) Գործը քննող քննիչին։

Եթե Բարձրագույն դատական խորհուրդը չի տիրապետում նյութերին, պարտավորվում եմ նաև ներկայացնել վերջինիս` հետաքրքրությունը փարատելու, իրականությանը փաստերով ծանոթանալու համար։

Նաև նշել, որ չեմ առարկում անձամբ  հանդիպել Բարձրագույն դատական խորհուրդ The Supreme Judicial Council of RA -ի ներկայացուցիչների հետ` իրեղեն ապացույցները փաստական տվյալներով համադրված հիմնավորումներով ներկայացնելու նպատակով։

Ավելացնեմ, որ ես նույնպես հույս եմ հայտնում, որ գործով կիրականացվի արդար քննություն (թեև` ունեմ հակառակի վերաբերյալ հիմնավոր կասկածներ), և մեղավորները կպատժվեն»։

Ավելի վաղ ԲԴԽ-ն հերքում է տարածել, որում նշված է․

«Փաստաբան Լուսինե Վիրաբյանը հրապարակումներ է կատարել այն մասին, թե վարչական դատարանում քննված գործով «Հայցվորին իրավահաջորդով փոխարինելու մասին» որոշումը երրորդ անձի կողմից ստանալ-չստանալու վերաբերյալ ապացույցները գործից «անհետացել» են:

Հանրությանը հարկ ենք համարում տեղեկացնել, որ նշված որոշումը կայացվել է դեռևս 2017 թվականին և ուղարկվել է դատավարության մասնակիցներին, այդ թվում նաև՝ երրորդ անձին՝ դեռևս 28.07.2017 թվականին ստացվել է վերջինիս կողմից:

Որոշումը ստանալուց զատ՝ երրորդ անձի ներկայացուցիչները մասնակցել են այդ որոշման կայացումից հետո հրավիրված դատական նիստերին, ստացել են դատական ակտերը և վերջիններիս համար ակնհայտ է եղել, որ հայցվորը փոխարինվել է իրավահաջորդով:

Ընդ որում՝ գործն ըստ էության լուծող դատական ակտը, որը, ի դեպ, եղել է երրորդ անձի օգտին, դատարանի որոշմամբ փոխարինված հայցվորի իրավահաջորդի կողմից բողոքարկվել է վերադաս դատական ատյաններ, իսկ երրորդ անձի կողմից «Հայցվորին իրավահաջորդով փոխարինելու մասին» որոշումը ստացված չլինելու մասին որևէ դիրքորոշում, ո՛չ գործի առաջին ատյանի դատարանում քննության, ո՛չ էլ գործն ըստ էության լուծող դատական ակտի դեմ ներկայացված բողոքի շրջանակներում վերադաս դատական ատյաններում քննության ընթացքում չեն ներկայացվել:
Փաստաբան Լուսինե Վիրաբյանը, որը գործի առաջին ատյանի դատարանում քննության ժամանակ չի հանդիսացել երրորդ անձի ներկայացուցիչը, հրապարակմամբ նշված հարցի վերաբերյալ դիրքորոշում է հայտնել միայն ՀՀ վճռաբեկ դատարանի կողմից գործն ըստ էության լուծող դատական ակտը բեկանելուց և գործը նոր քննության ուղարկելուց հետո՝ 2022 թվականին:

Հատուկ ցանկանում ենք ընդգծել, որ փաստաբան Վիրաբյանի կողմից հրապարակման մեջ նշված ապացույց-լուսանկարների մասին փաստաբան Վիրաբյանը նշել է նաև «Հայցվորին իրավահաջորդով փոխարինելու մասին» որոշումը բողոքարկելու վերաբերյալ իր վճռաբեկ բողոքում՝ կցելով սկավառակներ, սակայն ՀՀ վճռաբեկ դատարանն արձանագրել է, որ ներկայացված սկավառակները որևէ ապացույց/լուսանկար չեն պարունակում:

Դատական իշխանությունը լիահույս է, որ պատկան մարմինների կողմից կիրականացվի օբյեկտիվ և բազմակողմանի քննություն, որի արդյուքում ենթադրյալ մեղավորները, այդ թվում նաև՝ կեղծ մատնություն տվող անձինք կենթարկվեն օրենքով նախատեսված պատասխանատվության»։