Ձեր վստահելի աղբյուրը

ԱԺ արտահերթ նիստում քննարկվում է կառավարության կողմից ներկայացված «Ազգային անվտանգության մարմիններում ծառայության մասին» օրենքում փոփոխություններ և լրացումներ կատարելու մասին  և «Ազգային անվտանգության մարմինների մասին» օրենքում փոփոխություններ և լրացումներ կատարելու մասին օրենքների նախագծերի փաթեթը։

ՀՀ ազգային անվտանգության ծառայության տնօրենի տեղակալ Անդրանիկ Սիմոնյանն ասաց, որ օրինագծերի ընդունման կարևորությունն ու հատապությունը պայմանավորված է  ԱԱԾ մարմիններում պրոֆեսիոնալ կադրերի հնարավոր արտահոսքը կանխելու, կադրային քաղաքականության արդյունավետությունը և ծառայության որակը բարելավելու, գործնականում առաջացող խնդիրներին լուծում տալու, օրենքներում կիրառվող հասկացությունները գործող օրենսդրությանը համապատասխանեցնելու անհրաժեշտությամբ։

Առաջարկվում է վերանայել ԱԱԾ մարմիններում ծառայության սահմանային տարիքային շեմը։
«Ներկայումս ենթասպայական կազմի և սպայական մինչև փոխգնդապետի կոչում ունեցողների համար 50, իսկ գնդապետի համար 55 տարեկան է, որն էապես ցածր է զինվորական և դրան հավասարեցված այլ ծառայությունների համար ոլորտային օրենքներով նախատեսված սահմանային տարիքից», - ասաց  ԱԱԾ փոխտնօրենը։

Նախագծով ԱԱԾ մարմիններում ծառայողների, բացառությամբ բարձրագույն սպայական կազմի, սահմանային տարիքը նախատեսվում է ավելացնել 2 տարով, միաժամանակ հաշվի առնելով բժշկական բնույթի մասնագիտական պաշտոնների համալրման առանձնահատկությունները, առաջարկվում է նախատեսել նշված պաշտոնները զբաղեցնող ծառայողների ծառայության ժամկետը 5 տարվա փոխարեն 10 տարով երկարաձգելու հնարավորություն։

Նախագծերով առաջարկվում է  վերանայել այս ոլորտում գործող որոշ կարգավորումներ։

ԱԺ «Հայաստան» խմբակցության պատգամավոր Գեղամ Մանուկյանը հարց հնչեցրեց «Ազգային անվտանգության մարմինների մասին» օրենքում փոփոխություններ և լրացումներ կատարելու մասին որոշման նախագծով առաջարկվող մի կետի վերաբերյալ, մասնավորապես,   «Լիազորված մարմնի արխիվի նյութերը գաղտնազերծվում կամ ոչնչացվում են օրենքով և այլ իրավական ակտերով սահմանված կարգով», մինչդեռ 2001 թվականին ընդունված օրենքում «ոչնչացվում» նախատեսված չի եղել։

«Ակնհայտ է այս օրենքի նորմից, որ ոչնչացման համար օրենքով կամ այլ իրավական ակտով նախատեսված որևէ ընթացակարգ գոյություն չի ունեցել, և փոփոխությունը կատարվում է այն տրամաբանությամբ, որ նաև օրենքով սահմանված լիազորող նորմ ունենանք ոչնչացնելու համար։  Հիմա խնդիրն ինչո՞ւմն է, ես չեմ հասկանում ձեր տագնապը»,- ասաց Անդրանիկ Սիմոնյանը։

Գեղամ Մանուկյանն արձագանքեց, որ,  ընդհանրապես, գաղտնի ծառայություններում ինչ-որ  x տարի հետո կարող են գաղտնազերծել  որևէ անձի գործունեություն, օրինակ  այդպես եղավ հայտնի, լեգենդար  հետախույզներ Վարդանյանների դեպքում, օրենքը դա թույլ է տալիս։

«Բայց մինչև գաղտնազերծումը օրենքի նախագծով ԱԱԾ-ում իրավունք են ստանում ոչնչացնել այդ փաստաթղթերը»,-ընդգծեց Մանուկյանը։

ԱԱԾ փոխտնօրենն ասաց. «Շատ լավ։ Օրենքով նախատեսվում է  ոչնչացման հնարավորություն և այդ հնարավորությունը  ծառայությանը տրվում է օրենքով կամ այլ իրավական ակտերով սահմանաված կարգով։  Խնդիրը ո՞րն է։  Ինչ-որ մեկը չի տանելու մի թուղթ, պատռի, գցի»։

«Հայաստան» խմբակցության քարտուղար Արծվիկ Մինասյանը հարց ուղղեց հարակից զեկուցող ՔՊ-ական Վիլեն Գաբրիելյանին.

«Մինչև այս փոփոխությունը ԱԱԾ որպես լիազոր մարմին իրավունք ուներ միայն գաղտնազերծել որոշակի տեղեկություն։  Այս փոփոխությունների հիման վրա իրավունք է վերապահվում նաև ոչնչացնել արխիվը։ Հարցը պարզ է՝ ի՞նչ հիմնավորումներով եք բերում այս նախագիծը,  կարո՞ղ է մի օր էլ պարզվի, որ հսկայածավալ արխիվային  նյութեր, որոնք պետք է բացահայտեին գործակալների մի մեծ  ցանց, ուղղակի ոչնչացվել են։ Երբ հղում եք տալիս օրենքին՝ այդ ո՞ր օրենքն է սահմանում պետական կարևորագույն գաղտնի կազմով տեղկությունների ոչնչացման ընթացակարգ։ Պարզ հարցադրում է»։

Վ. Գաբրիելյանն ասաց. «Տվյալ օրինագծով առաջարկվող ոչնչացումը, խնդրում եմ, չառանձնացնեք հենց դրանից առաջ գրված գաղտնազերծումից, քանի որ, կարծում եմ, իրենից ենթադրում է  շատ հստակ բնականոն կապ՝  գաղտնազերծում ու նոր ոչնչացում, այլ ոչ ուղղակի ոչնչացում»։

Արծվիկ Մինասյանն ասաց, որ եթե այդպիսի բան է նկատի առնվում,  ուրմեն պետք է հստակ կարգավորում լինի, որ ոչնչացումը կարող է լինել բացառապես գաղտնազերծումից հետո։

«Բայց խոսքը գնում է  անգամ այն դեպքերում, որ հեչ պարտադիր էլ չի գաղտնազերծումը, բայց ոչնչացման իրավասություն եք վերապահում։ Ո՞րն է անհրաժեշտությունը, հիմնավորումը, ինչո՞ւ ենք մենք այսօր նման իրավունք վերապահում և այն էլ սահմանադրական նորմի կոպիտ խախտմամբ։ Սահմանադրական նորմն ասում է՝ անգամ եթե լիազորող նորմ ես ամրագրում, բավարար հստակություն պետք է լինի, թե արդյոք ո՞ր տեղեկատվությանն է  վերաբերում։ Եթե ընթացիկ  գործունեության մասին է, օրինակ, հաշվապահական փաստաթղթեր, ձեր ասածը ճիշտ է,  մտնում է  պահպանման, արխիվացման, վերացման կարգավորումների տակ, բայց  եթե դուք չեք նույնականացում, թե ինչի մասին է խոսքը, ստացվում է ցանկացած փաստաթուղթ, ներառյալ այնպիսի կարևորագույն տեղեկատվություն, որ վաղը, մյուս օրը  լյուստրացիայի համար կարևոր և օգտակար քայլ կարող էր լինել, կարող է ոչնչացվել»,- ասաց Մինասյանը։

Վիլեն Գաբրիելյանն ասաց, որ քվեարկությունից հետո  հանձնաժողովի նիստ է լինելու,  կարող է պատգամավորը մասնակցել, տեղում քննարկել հարցը, գուցե հիմնավոր բան է ասում։