Ձեր վստահելի աղբյուրը

Սյունիքը ներկայացնող պատգամավորներն այլևս «Վերածնվող Հայաստան» կուսակցության մաս չեն կազմում, բայց միևնույն ժամանակ հանդիսանում են ԱԺ «Հայաստան» խմբակցության անդամներ։ Այս մասին այսօր Ազգային ժողովում լրագրողների հետ զրույցում հայտարարեց ընդդւմադիր պատգամավոր Աննա Գրիգորյանը։ 

Նրա խոսքով՝ այն իլյուզաները, որոնք որոշ մարդիկ տածում են, թե «Հայաստան» խմբակցությունը կազմաքանդվում է, իրականությանը չեն համապատասխանում։

«Ես, Արթուր Սարգսյանը, ինչպես նաև Վահե Հակոբյանը շարունակում ենք լինել «Հայաստան» խմբակցության անդամ, պահպանում ենք գործընկերային հարաբերությունները, ուղղակի ես և Արթուր Սարգսյանը հանդիսանում ենք խմբակցության պատգամավորներ, բայց ոչ «Վերածնվող Հայաստան» կուսակցության անդամներ»,- հայտարարեց Աննա Գրիգորյանը։

Հարցին, թե որն է կուսակցությունից դուրս գալու պատճառը, պատգամավորը պատասխանեց.

«Քանի դեռ մեր երկրում կան ներքաղաքական լարված իրավիճակ և արտաքին լրջագույն մարտահրավերներ, ես կարծում եմ, որ այս պահին տեղին չէ ներթիմային որոշ տարաձայնությունների մասին բարձրաձայնել։ Կարծում եմ՝ կգա այդ մասին խոսելու օրը, բայց հենց այսօր նպատակահարմար չեմ գտնում դրանց մասին խոսելու։ Ուղղակի պետք է արձանագրենք՝ մենք դուրս ենք եկել կուսակցությունից, բայց հանդիսանում ենք «Հայաստան» խմբակցության պատգամավորներ։ Խմբակցությունը կուռ է և շարունակում է իր գործունեությունն այնպես, ինչպես նախկինում»։

Աննա Գրիգորյանը նշեց նաև, որ սյունեցի պատգամավորների համագործակցությունը «Վերածնվող Հայաստան» կուսակցության ղեկավարի հետ դադարեցվել է որոշ ժամանակ առաջ, իսկ պաշտոնապես՝ մեկ ամիս առաջ, սակայն դա որևէ կապ չունի ինչ-որ քրեական հետապնդումների հետ։ «Գիտենք, որ այս իշխանությունը ջանք ու եռանդ չի խնայում ապօրինի քրեական հետապնդումներ իրականացնել քաղաքական գործիչների նկատմամբ»,- ընդգծեց նա։  

Լրագրողները նաև հետաքրքրվեցին, թե արդյոք ճիշտ են Ալեն Սիմոնյանի այն հայտարարությունները, թե ինքն ունի հստակ աղբյուրներ և գիտի, որ «Հայաստան» դաշինքը կազմալուծվելու է, Աննա Գրիգորյանը պատասխանեց. «Դա պարզապես թեթև ծիծաղ է առաջացնում»։