Ձեր վստահելի աղբյուրը

«Ինչքան էլ տարօրինակ հնչի, մենք այս փուլում ամենամեծ խնդիրը լուծել ենք՝ մեքենաների ձեռքբերման պրոբլեմի մասին է խոսքը»,-ՆԳ նախարարություն ստեղծելու օրենքի նախագծի քննարկման ժամանակ կառավարության նիստում հայտնեց Նիկոլ Փաշինյանը:

Նա ասաց, որ այն լուրջ խնդիր էր, քանի որ աշխարհում մեքենաների դեֆիցիտ կա:

«Մի խնդիր կա, որը չի հաջողվում լուծել, այն է՝ կանանց ներգրավումը պարեկային ծառայության մեջ»,-ասաց գործադիրի ղեկավարը և ափսոսանք հայտնեց, որ ՄԻՊ-ը չի մասնակցում նիստին, ով պետք է նպաստեր այդ խնդրի լուծմանը:

ԱԽ քարտուղար Արմեն Գրիգորյանն էլ տեղեկացրեց, որ նաև ԱԱԾ-ի Պետական պահպանության գնդի բարեփոխում է կատարվում չզեկուցվող հարցով:

«ԱԱԾ-ից Պետական պահպանության ծառայությունն առանձնացնում ենք և դարձնում ենք առանձին մարմին, որը կլինի վարչապետի ներքո գործող»,-հայտնեց Գրիգորյանը:

Նա տեղեկացրեց, որ չզեկուցվող նախագծով պաշտոնաթող նախագահին պետական պահպանության ծառայության տրամադրման՝ նախկինում սահմանված ցմահ ժամանակահատվածը կրճատվում է մինչև 7 տարի, իսկ վարչապետի դեպքում՝ 10 տարի:

Փաշինյանն էլ հավելեց, որ անհրաժեշտության դեպում պաշտոնները թողնելուց հետո երկրի առաջին դեմքերի պետական պահպանության ծառայութունը կարող է երկարացվել:

ՊՊԾ-ն վարչապետի ենթակայության տակ բերելու որոշումը Փաշինյանն ազգային անվտանգության ոլորտի բարեփոխում գնահատեց՝ հիմնավորելով, որ ԱԱԾ-ն այսուհետ կզբաղվի իր հիմնական գործառույթներով, որոնցից առաջինը հակահետախուզությունն է:

«Ուզում էի ասել գոհունակությամբ, բայց՝ ոչ այդքան գոհունակությամբ,  պետք է ասել, որ Հակահետախուզության առումով ԱԱԾ-ն վերջին շրջանում աննախադեպ հաջողություններ ունի»,-հայտարարեց գործադիրի ղեկավարը:

Նա հավելեց, որ բացահայտումների մասին հասարակությունը իրազեկվում է և շատ ցավալի  համարեց, որ նման երևույթներ կան: