Ձեր վստահելի աղբյուրը

«Բոլոր երկրների կառավարությունները ցանկացած բան, որ ուզում են անեն միջազգային փորձ են մեջբերում, բայց որպես կանոն՝ կիսատ»,-ֆիզիկական անձանց եկամուտների համընդհանուր հայտարարագրման համակարգի ներդրում նախատեսող օրենսդրական նախաձեռնության վերաբերյալ աշխատանքային քննարկման ժամանակ ԱԺ-ում հայտարարեց տնտեսագետ Փայլակ Թադևոսյանը:

Նա տեղեկացրեց, որ աշխարհում համընդհանուր հայտարարագրման մեխանիզմը ներդրած է, բայց հստակ նպատակներով և հստակ արդյունքներ է ապահովում, օրինակ՝ այն ներդրվում է, երբ այդ երկրում պրոգրեսիվ հարկում է իրականացվում, որը Հայաստանում չկա:

«Առաջարկվող հայտարարագրման համակարգն այդ ընդհանուր մոտեցման, միջազգային փորձի հետ ընդհանրապես կապ չունի»,-հյտարարեց տնտեսագետը:

Հետաքրքրվելով, թե հայտարարագիր ներկայացնողների շրջանակը ով է որոշել և արձանագրելով, որ նախագծով նախատեսված է, որ եկամտային հարկի վերադարձ ստացողները պարտադիր պետք է հայտարարագիր ներկայացնեն՝ Թադևոսյանն ասաց. «Այստեղ սա ի՞նչ նպատակ է հետապնդում, եթե նման անձանց հաշվառմա՞նն է վերաբերվում, ապա 2021թ.-ին 100 մլն դրամ է ՊԵԿ-ում ծախսվել է վերադարձի հաշվառման համար, որում ամբողջ տեղեկատվությունն առկա է, հետևաբար հաշվառման նպատակ էլ այստեղ չկա, հարկի նվազեցում էլ չենք անում, ստացվում է, որ  նրանց համար ընդամենը մի հատ թուղթ է ստորագրվելու»:

Տնտեսական հարցերի մշտական հանձնաժողովի նախագահ Բաբկեն Թունյանը հայտնեց, որ հայտարարագրվողների շրջանակը քննարկման ենթակա է, բայց կոնսենսուս կա և այդ պատճառով էլ որոշել են, որ առաջին փուլում հայտարարագիր լրացնեն այն պաշտոնյաները, որոնք արդեն այն ներկայացնում են Հակակառուպցիան հանձնաժողովին:

«Կասեք տրամաբանությունը ո՞րն է: Եթե դուք, օրինակ, մի օր անհարգելի բացակայեք ԱԺ նիստերից և տարվա համար ձեր եկամտահարկն, ինչքան վերադարձ են արել Ձեզ, պետությունը հետ ուզի, Ձեր դուրը կգա՞: Այստեղ ասվում է՝ ով հայտարարագիրը չի տվել՝ եկամտահարկը հետ պետք է տա:

Ես եկամտահարկի վերադարձ ստացող եմ, ասում եմ՝ ինչո՞ւ եք ինձ այդպես պատժում  հայտարարագիր չներկայացնելու համար, ես ի՞նչ եմ արել ձեզ, ինչո՞ւ ինձ այդքան չեք սիրում, չեք ուզում՝ մի տվեք այդ փողը, բայց մի ասեք՝ մի հատ հայտարարագիր չտալու համար վարչականով եմ տուգանելու, փողերն էլ հետ եմ ուզելու: Դեռ պարզ չէ, թե նախորդ 5 տարիների վճարած եկամտահա՞րկն էլ պետք է հետ տամ, թե՞ միայն այդ տարվան է վերաբերում:

Տնտեսագետը հիշեցրեց, որ նախագծով նաև սահմանված է, որ  «Փողերի լվացման մասին» օրենքով շահառու հանդիսացողները նույնպես պետք է հայտարարագիր ներկայցնեն և  ԱԺ պատգամավորներին և կառավարության ներկայացուցիչներին հարցրեց. «Մեկդ կարող եք   բացատրել, թե փողերի լվացման շահառու ո՞վ կարող է հանդիսանալ: Այն որոշելու ռիսկը թողնում եք քաղաքացու վար, որ նա որոշի հայտարարագիր տա, թե ոչ: Երբ այն որոշում է ԿԲ-ն, նա հասկանում է, թե ով է փողերի լվացման շահառուն, իսկ ես, որպես շարքային քաղաքացի, չեմ հասկանում այդ փողերի լվացման տակ ընկնում եմ, թե ոչ»:

Անդրադառնալով նախագծի այն դրույթին, որ հայատարարագիր պետք է տա ռեզիդենտ ՀՀ քաղաքացին՝ Փայլակ Թադևոսյանը հայտարարեց. «Այս օրենքն ընդունելուց հետո ես բոլորին կոչ եմ անելու դիմեն հարկային մարմնին ռեզիդենտության տեղկանք ստանալու, որ քաղաքացիներն իմանան՝ հայտարարագիր ներկայացնո՞ղ են, թե ոչ: Հետո հայտարարագրման կամավորության սկզբունքն ինչու չեք դրել մեջը»:

Քննարկման վերաբերյալ տեսանյութը կզետեղվի քիչ ուշ: