![](https://panorama.am/news_images/921/2761815_1/f6384a05933b76_6384a05933bbd.thumb.png)
Թուրքիան ամեն ինչ անում է քուրդ ժողովրդին ոչնչացնելու համար։. քրդական համայնքի բողոքի ակցիան ՄԱԿ-ի դիմաց
Հայաստանում քրդական համայնքի նախաձեռնությամբ այսօր ՄԱԿ-ի գրասենյակի դիմաց անցկացվեց բողոքի ակցիա՝ ընդդեմ թուրքական ագրեսիայի և Սիրիայում թուրքական կողմի գործողությունների։
ԱԺ պատգամավոր Կնյազ Հասանովը նշեց, որ քրդական համայնքն իր ձայնն է բարձրացնում ընդդեմ թուրքական իշխանությունների կատարած ոճրագործությունների ու հանցագործությունների` Սիրիայում ապրող և ընդհանրապես քուրդ ժողովրդի նկատմամբ։
«Մենք ականատես եղանք, որ թուրքական իշխանությունները Ստամբուլում պայթուն ստեղծեցին, որի հետևանքով 4-5 զոհ եղավ, դեռ դա չվերջացրած, Թուրքիայի իշխանությունները հայտարարեցին, որ այդ գործում իրենց մեղքն ունեն Քրդական բանվորական կուսակցությունը և Սիրիայի քրդերը:
Դրա համար Էրդողանն ասաց՝ պետք է հարձակվենք Սիրիայի քրդերի վրա, իբր տեռորի դեմ առնելու համար: Էրդողանը հայտարարում է, որ բոլոր քրդերին պետք է ոչնչացնել՝ անկախ նրանից, նրանք գտնվում են Թուրքիայում, Սիրիայում, Իրաքում, թե Իրանում: Իհարկե աշխարհի ամենահզոր տեռորիստները թուրքական իշխանություններն են»,- նշեց Կնյազ Հասանովը։
Նրա խոսքով՝ այս ամենն արվում է քուրդ ժողովրդին ոչնչացնելու համար։
Պատգամավորն ասաց, որ քուրդ ժողովրդի 4 մասերին կոչ են անում՝ միասնական դառնալ և թուրքական այս ցեղասպանության դեմն առնեն:
«Մենք կոչ ենք անում նաև միջազգային հանրությանը, ՄԱԿ-ի գրասենյակին, աշխարհի առաջադեմ մարդկությանը, ձեռք մեկնեն ու բռնեն թուրքական իշխանությունների ցեղասպան ձեռքը, որ ոճրագործություն է անում 40-50 միլիոնանոց քուրդ ժողովրդի նկատմամբ»,- ընդգծեց նա։
Կնյազ Հասանովը նշեց նաև, որ Թուրքիան գրավել է Սիրիայի քրդերի խոշոր 4-5 քաղաք։
«Քուրդ ժողովուրդն այսօր գտնվում է վիրավոր վիճակում և դա միջազգային հանրությանը չի հետաքրքրում: Նույնը տեսնում ենք Ադրբեջանի կողմից հայ ժողովրդի նկատմամբ: Ադրբեջանն ամեն օր հայտարարում է, թե հայկական ԶՈւ-ն գնդակոծում է իրենց դիրքերը, սակայն մի քանի օր հետո Ադրբեջանը հարձակվում է և ՀՀ ինքնիշխան տարածքներն օկուպացնում։ Մենք մեր ձայնն ենք բարձրացնում հայ ժողովրդի համար, մենք որպես ՀՀ քաղաքացիներ, ուզում ենք, որ աշխարհը տեսնի այս հանցագործությունները»,- հայտարարեց պատգամավորը։
Նա նաև նկատեց, որ այսօր տեսնում են, թե գերտերություններն ինչպես են ամեն ինչ անում իրենց շահերի համար։
Լրահոս
Տեսանյութեր
![Թուրքիան ու Ադրբեջանն այլևս միասնական իրողություն են դրանից բխող բոլոր հետևանքներով. Մելքոնյան](https://panorama.am/video_images/17/50811_1/mela_6760_thumb_v1_thumb_v1_thumb.thumb.jpg)
Թուրքիան ու Ադրբեջանն այլևս միասնական իրողություն են դրանից բխող բոլոր հետևանքներով. Մելքոնյան