Ձեր վստահելի աղբյուրը

Առնվազն 19 բնակավայրեր, որոնք գտնվում են Սիրիայի Հալեպ նահանգի սահմանամերձ Աշ Շեհբա և Աֆրին արվարձաններում, երկուշաբթի օրը թուրքական զորքերի գնդակոծության են ենթարկվել։ Firat գործակալության տվյալներով՝ թուրքական բանակի հրետանին նրանց ուղղությամբ արձակել է 545 արկ։ Ըստ գործակալության՝ Թանիբ գյուղում սիրիացի զինվորականների դիրքը է գնդակոծվել, ինչի արդյունքում երեք զինվոր է զոհվել։

Կիրակի օրը զոհվել է կառավարական ուժերի ևս հինգ զինծառայող։ Ընդհանուր առմամբ, ըստ Firat-ի, նոյեմբերի 20-ից, երբ սկսվեց թուրքական «Ճանկ-սուր» ռազմական գործողությունը, երկրի հյուսիսում տեղակայված սիրիական զորքերի կորուստը 22 զինծառայող է եղել։ ՏԱՍՍ-ը հայտնում է, որ քրդական «Ժողովրդավարական Սիրիայի ուժերի» (SDF) շարքերում սպանվել է 35 մարտիկ։

Ավելի վաղ Սիրիայի զինված ուժերի հրամանատարությունը ռազմական ուժեղացում և 20 զրահամեքենա է տեղակայել Հալեպի նահանգ՝ թուրքական հնարավոր ներխուժումը հետ մղելու համար։ Կառավարական ուժերը դիրքեր են զբաղեցրել Մանբիջի, Թել Ռիֆաթի և Այն ալ Արաբի շրջաններում, որոնք գտնվում են քրդական ուժերի ձեռքում։

Իր հերթին, ըստ «Ալ Ախբար» թերթի, վերջին 48 ժամվա ընթացքում Բաբ էս-Սալամ անցակետով մի քանի ավտոշարասյուններ են տեղափոխվել Սիրիայի հյուսիսում գտնվող Անկարայի կողմից ստեղծված անվտանգության գոտի: Ընդդիմության աղբյուրները պարբերականին հայտնել են, որ սահմանամերձ Աազազ, Ջերաբլուս և Ալ-Բաբ շրջաններում տեղակայված թուրքամետ կազմավորումներում մարտական պատրաստություն է հայտարարվել։