Ձեր վստահելի աղբյուրը

«Ներկայացված նախագիծը, ոչ ավել, ոչ պակաս, սուպերվարչապետությունն ամրապնդելուն ուղղված քայլ է և հակասում է ՔՊ-ի նախկինում հնչեցրած բոլոր մոտեցումներին»,-ԱԺ-ում հայտարարեց  «Հայաստան» խմբակցության քարտուղար Արծվիկ Մինասյանը՝ ելույթ ունենալով ՊՊԾ-ն ԱԱԾ-ից վարչապետի ենթակայության տակ տանելու նախագծի վերաբերյալ:

Նա համոզմունք հայտնեց, որ ազգային անվտանգության համակարգի հերթական կազմաքանդումն է տեղի ունենում, որը ոչ թե փոքր, այլ գլոբալ փոփոխություններ է ենթադրում, բայց դրա համար պետք է առաջին հերթին ներկայացվեր ռեֆորմի ամբողջական ծրագիրը, որի ներքո էլ իրականացվեր նախագծով նախատեսված քայլերը:

«Բայց այնամենից , ինչ տեսել ենք հատկապես Նիկոլ Փաշինյանի կառավարման շրջանում ՊՊԾ-ի վարքագիծում, կարող ենք արձանագրել, որ այս կառույցը իշխանության ձեռքի ռազմականացված կառույցն է, որն իրականացնում է ընդդիմադիրների և քաղաքացիների նկատմամբ կոնկրետ ահաբեկման քայլեր»,-ասաց պատգամավորը և հիշեցրեց, թե ինչպես էին դիպուկահարները մեքենայի միջից և ԱԺ պատուհանից թիրախավորում հանրահավաքի մասնակիցներին, ինչպես նաև փողոցում և խորհրդարանի դահլիճում գործադրում բռնբությունները:

Նա հայտարարեց, որ խոցելի է նաև նախագծերի փաթեթով առաջարկված բովանդակային կարգավորումները:

«Դիցուկ՝ ըստ գործող և առաջարկվող կարգավորման, եթ վարչապետը վերցնում է զենքը և պահում մեկի ճակատին, որ պետք է, ժողովրդական լեզվով ասած, գյուլլի, ապա ի՞նչ ֆունկցիա պետք է իրականացնի ՊՊԾ-ն: Այստեղ նկարագրվածով՝ ստացվում է, որ նույնիսկ պետք է օժանդակի»,-հայտնեց Մինասյանը և, նշելով, թե նախագծով սահմանվում է, որ պահպանության տակ գտնվող այլ անձանց նման  արարքի դեպքում ՊՊԾ-ն կարող է զգուշացնել, դադարեցնել նրա պաշտպանությունը և միջոցներ ձեռնարկել, հավելեց . «Բայց այս երք անձը՝ ՀՀ նախագահը, Ազգային ժողովի նախագահը և վարչապետը կարող են իրականացնել կոնկրետ քրեորեն պատժելի արարք, հանցագործություն, մարդասպանության փորձ, բայց նրանց հանդեպ ՊՊԾ-ն, ըստ նախագծի, որևէ կանխարգելիչ գործառույթ չունի»:

Ընդդիմադիր պատգամավորը նաև տարակուսանք հայտնեց, թե ինչ չափանիշով է ընտրվել պաշտոնավարումից հետո նախագահին և վարչապետին 7 և 10 տարով պետական պահպանություն հատկացնելու ժամկետները, երբ հույժ գաղտնի տեղեկատվության պահպանման ժամանակահատվածը 30 տարի է: