Ձեր վստահելի աղբյուրը

Ռուսաստանը պատրաստ է բազմակողմանի աջակցություն ցուցաբերել Հայաստանի և Ադրբեջանի միջև խաղաղության պայմանագրի նախապատրաստմանը։ Այդ մասին ՏԱՍՍ-ին տված հարցազրույցում ասել է ՌԴ ԱԳՆ ԱՊՀ երկրների չորրորդ վարչության տնօրեն Դենիս Գոնչարը։

«Մենք պատրաստ ենք շարունակել հնարավոր աջակցություն ցուցաբերել հայ-ադրբեջանական սահմանի սահմանազատման և Երևանի ու Բաքվի միջև խաղաղության պայմանագրի նախապատրաստման հարցում, այդ թվում՝ Ռուսաստանի տարածքում համապատասխան եռակողմ բարձր մակարդակի հանդիպումների կազմակերպման միջոցով: Գործընթացները, որոնք չափազանց զգայուն են երկու կողմերի համար, պահանջում են փոխընդունելի և երկարաժամկետ լուծումների որոնում»,-ասել է դիվանագետը։

Նրա խոսքով՝ բանակցությունների մանրամասների բացահայտումը կամ մամուլում կողմերի դիրքորոշումների քննարկումը միշտ չէ, որ ձեռնտու է։

«Մենք նաև իրականացնում ենք երկու երկրների հանրության և փորձագիտական համայնքների միջև հերթական շփումների նախապատրաստում: Համատեղ ջանքերի այս կարևոր ուղղությունը կոչված է նպաստելու Հայաստանի և Ադրբեջանի հարաբերություններում վստահության մթնոլորտի ձևավորմանը»,-հավելել է Գոնչարը։ Նրա խոսքով, այս գործընթացում կարող է իր ներդրումն ունենալ նաև եռակողմ միջխորհրդարանական երկխոսությունը, որի մեկնարկի նախաձեռնությունը աջակցություն է ստացել Սոչիի գագաթնաժողովում։

«Համապատասխան հանդիպումների ժամկետների մասին պատշաճ հայտարարություններ կլինեն»,- հավելել է նա։