Ձեր վստահելի աղբյուրը

«Եվրոպական Միությունը՝ որպես մարդու իրավունքների պաշտպանության ջատագով կառույց պետք է պատժամիջոցներ կիրառի Ադրբեջանի նկատմամբ Արցախում 120 հազար մարդու  իրավունքներն խիստ ու կոպիտ ոտնահարման համար»,-Երևանում լրագրողների հետ հանդիպմանը հայտարարեց Արցախի ՄԻՊ Գեղամ Ստեփանյանը։

Նա հիշեցրեց, որ ԵՄ-ն մարդու իրավունքների պաշտպանության արժեքների վրա հիմնված կառույց է, աշխարհում տարածում է մարդու իրավունքների պաշտպանություն, բայց մինչ այս պահը որևէ կերպ չի արձագանքել Ադրբեջանի հանցավոր գործողություններին։

«Իհարկե, աշխարհքաղաքական ու տնտեսական շահերը հատկապես վերջին շրջանում ստվերում են թողնում մարդու իրավունքների պաշտպանությունն ու դրա օրակարգը, բայց այդպես չպետք է լինի կոնկրետ ԵՄ դեպքում, որն առաջինը պետք է արձագանքի ստեղծված իրավիճակին ու կանգնի մարդու իրավունքների պաշտպանության դիրքերում»,-նշեց նա։

Նույն ասուլիսի մասնակից Արցախի ԱԳ նախարարի պաշտոնակատար Դավիթ Բաբայանը հայտնեց, որ բազմաթիվ նամակներ են ուղարկել եվրոպական կառույցներ՝ ներկայացնելով ադրբեջանցիների կողմից Լաչինի միջանցքը փակելու հետևանքով առաջացած վիճակն ու վտանգները։

«Ակնակալում ենք, որ ԵՄ-ն համապատասխան գնահատական կտա Ադրբեջանի քայլերին, քանի որ տեղի է ունեում մարդասիրական աղետ, ցեղասպան քաղաքականության դրսևորում։ Մենք արդեն իսկ պաշտոնական նամակներ ենք ուղարկել Եվրոպական տարբեր կառույցներ, հույս ունենք, որ կոնկրետ քայլեր կձեռնարկվեն, կլինեն հասցեական գնահատականներ ու պատժամիջոցներ Ադրբեջանի նկատմամաբ։ Գիտե՞ք, անտարբերությունը ամենաավտանգավոր երևույթներից մեկն է»,-ասաց Բաբայանը։